Son illərdə Azərbaycanda bağlantı texnologiyalarının, infrastruktrun təkmilləşdirilməsi internetin problemlərini müəyyən qədər azaldıb. Lakin təsssüf ki, rayonlarda və kənar bölgələrdə hələ də bəzi çətinliklər yaşanmağa davam edir. Ümid edirik bu hallar yaxın illərdə öz həllini tapacaq. İndiyə qədər internet xətlərinin torpaq altından aparılmasına üstünlük verilirdi. Amma bilinənə əsasən son zamanlar işıq dirəklərinin də internet xətlərinin çəkilməsində istifadəsi prosesi xeyli sürətlənib. Belə ki, Cable.co.uk tərəfindən dünya ölkələri üzrə 1GB mobil internetin qiymət statistikası tərtib olunub. Hazırlanmış siyahıda Azərbaycan tam olaraq 122-ci yerdə qərarlaşıb.
1GB internetin ortalama qiymət statistikası 1.76$ təyin edilib
Dünya ölkələri arasında ən ucuz və ən bahalı internet qiyməti arasında inanılmaz bir qiymət fərqi var. Siyahıya İsrail başçılıq edir və 1GB internetin qiyməti İsraildə sadəcə 0.04 dollardır. 1GB internetin ən bahalı olduğu yer isə Müqəddəs Yelena adasıdır və tam olaraq 41.06 dollar ödəmək məcburiyyətindəsiniz. Sırada sonuncu yerdə yerləşən yelena adası 233-cü yerdədir.
Azərbaycan bu siyahıda 1GB mobil internetin ortalama qiymət statistikasına görə 122-ci yerdə qərarlaşıb. Ölkəmizdə 1GB internet ortalama olaraq 1.76 dollar təşkil edib. Müqayisə üçün digər ölkələrdən Türkiyə 0.39 dollar ilə 18-ci sırada, Gürcüstan 1.03 dollar ilə 77-ci sırada, Rusiya 0.48 dollar ilə 30-cu sırada, Amerika/Kanada 5.62 və 5.94 dollar ortalama ilə 202 və 204-cü sırada, Çin 0.41 dollar ortalama ilə 22-ci sırada, Ermənistan 0.91 dollar ilə 65-ci yerdə və.s yerləşir.
Uzun müddətdir hər yerdə 4G və ya 5G bağlantısını tətbiq edən ölkələr bu siyahıda daha yaxşı üst pillələrə yerləşməyi bacarıblar. Belə ölkələr minimum qiymətə ən yüksək həcmli internet tarifləri verə bildiyindən qiymətlər xeyli aşağı olub. Digər bir tərəfdən də doymuş bazara sahib ölkələrdə provayderlərin qiyməti çox vaxt aşağı çəkməsi müşahidə olunur. Nəticədə yenə həmin ölkələr siyahıda önə çıxırlar.
Ölkəmizdə 1GB mobil internetin ortalama qiymət statistikası ən çox infrastruktur səbəbi ilə yüksək qeydə alınıb. Çünki, mənbə 1GB internet üçün maksimum qiymətin 9.80 dollar olduğunu qeyd edib. Yəqin ki, bəzi bölgələrimizdə mobil şəbəkənin varlığında yaşanan problemlər qiymətləri həqiqətən bu qədər yüksəltmiş ola bilər. Əks halda bəlkə də ən azından ilk 70 arasına daxil ola bilərdik.
