Android smartfonlarda son zamanlar giriş səviyyəsi cihazlarda belə minimum 90Hz tezlikli ekran panelinin istifadə edildiyini görürük. “Hz” deyə qeyd etdiyimiz bu vahid ən sadə dildə ekran panelinin saniyədə neçə kadr göstərə biləcəyini xarakterizə edir. Yəni ekranın görüntü yeniləmə tezliyi nə qədər çox olarsa smartfonda daha “hamar” təcrübə yaşaya bilərsiniz. Bəziləri düşünür ki, tezliyin yüksək olması yalnız oyunlar üçün və.s əhəmiyyətlidir. Lakin sadə işlər üçün də cihazın sizə görüntüləri daha keyfiyyətli çatdıra bilməsində tezlik ciddi rola malikdir. Dünya üzrə tanınmış Marques Brownlee ləqəbli Yutuber ötən gün Pixel 6a modeli ilə bağlı hazırladığı videoda iPhone 13 Pro modelini yanaşı gətirib. Qarşılaşdırmada isə Pixel 6a modelinin 60Hz ekranı ilə, tezliyi 60Hz olaraq sazlanmış iPhone 13 Pro göstərilib. MKBHD birbaşa olaraq bu 2 cihazın ekranlarının müqayisəsi haqqında fikir bildirməsə də həmin kadrda Pixel 6a modelinin ekranını tənqid etməsi mənfi qarşılanıb.
Pixel 6a modelində və ya digər Android cihazlarda 60Hz həqiqətən yavaş görünə bilər?
Bu suala müəyyən problemlər səbəbi ilə bəli cavabını verə bilərik. Android smartfonların interfeysini hazırlayan brendlər bəzən animasiyaların səlisliyinə ciddi diqqət göstərmirlər. Animasiyaların səlisliyi dedikdə məsələn, sürüşdürmə hərəkəti edərkən görüntünün ekranda “ilişmədən” yuxarı doğru hərəkət etməsi nəzərdə tutulur. Apple şirkətinin iOS əməliyyat sistemində effekt və animasiyalar adətən daha keyfiyyətli hazırlanır. Ona görə də bəzən iki 60Hz ekranlı cihazı yanaşı gətirdikdə iPhone modellərinin daha yaxşı hissiyat yaratması mümkündür. Lakin unutmaq olmaz ki, orta seqment cihazdakı 60Hz AMOLED panellə flaqman cihazdakı 60Hz AMOLED ekran eyni deyil. Flaqman cihazdakı 60Hz AMOLED panelin görüntü keyfiyyəti nisbətən təkmilləşdirilmiş olduğundan məhz “keyfiyyət” anlayışı sizi yanılda bilər. İndi isə iPhone 13 Pro və Pixel 6a arasındakı mövzuya baxaq.
Marques Brownlee isə öz ifadələrində yeni anons edilmiş Pixel 6a modelinin, 60Hz tezlikli digər cihazlardan belə daha yavaş hiss etdirdiyini bildirib. Üstəlik iPhone 13 Pro modelini 60Hz tezliyə sazlayaraq müqayisə üçün yanaşı gətirib. Bu isə izləyicilər arasında tənqidə səbəb olub.
Videoda 60Hz tezlikdə olan hər iki cihaz arasında ciddi bir fərq olduğu hiss edilməyib. 450$ qiymət etiketinə sahib Pixel 6a modelində Google şirkətinin 60Hz ekran istifadə etməsi izləyicilərin fikrinə görə qəbul edilə bilən haldır. Lakin arada təqribi 2 dəfəyə qədər qiymət fərqi olan modellə müqayisə edilməsi və videonun irəliləyən hissələrində isə iPhone SE modelinin tövsiyə edilməsi qıcıqları daha da artırıb. Narazılığını bildirən insanlar ən azından texniki olaraq 60Hz ekrana malik iPhone 13 modelini yanaşı gətirməyi təklif ediblər. Səbəb isə sensor tezliyinin də (görüntü yeniləmə tezliyindən fərqli olaraq barmağ hərəkətlərinin işlənmə tezliyi) iPhone 13 Pro modelində Pixel 6a modelindən daha sürətli reaksiya verməsi kimi göstərilib.
Nəticədə Pixel 6a modelinin icmalı üçün hazırlanan video bir növ ekran qarşılaşdırılması videosuna çevrilib. Mövzuya optimal baxış bucağından baxsaq Google şirkəti bu smartfonu çox ucuz satmadığı üçün ən azından 90Hz tezlikli ekran paneli istifadə edə bilərdi. Digər bir tərəfdən də təqribi 800$ qiymətə təklif olunan iPhone 13 modelində Apple hələ də 60Hz ekran istifadə edir. Ona görə Marques Brownlee-nin Pixel 6a modelində 60Hz ekran barədə mənfi fikirləri daha ötən il 120Hz tezlikli ekran paneli ilə təchiz iPhone 13 seriyası üzərində verməsi birmənalı qarşılanmır.
Mövzu barədə siz nələr düşünürsünüz? Fikirlərinizi rəylərdə bizimlə bölüşə bilərsiniz.
