Fransanın paytaxtı Parisdə keçirilən Mondial de l’Auto 2026 avtomobil sərgisində gözlənilməz hadisə baş verib. Azyaşlı uşaq sərgidə nümayiş etdirilən lüks Mercedes VLE elektromobilinin sükanı arxasına keçərək avtomobili stendin divarına çırpıb.
Hadisə oktyabrın 17-də Paris Expo Porte de Versailles sərgi kompleksində qeydə alınıb. Automotomagazine-in məlumatına görə, uşaq avtomobilin sürücü oturacağına əyləşib və təsadüfən geri ötürməni işə salıb. Nəticədə avtomobil geriyə hərəkət edərək sərgi stendinin divarına çırpılıb.
Sosial şəbəkələrdə yayılan görüntülərdə Mercedes VLE-nin geriyə doğru hərəkət etdiyi və divara dəydiyi görünür. Qəzadan sonra uşaq təəccüblü ifadə ilə avtomobildən düşüb. Xoşbəxtlikdən, hadisə zamanı xəsarət alan olmayıb.
Fransa mediasında yayılan video qısa müddətdə yüz minlərlə baxış toplayıb və sosial şəbəkələrdə geniş müzakirələrə səbəb olub.
Hadisədən sonra avtomobil sərgilərində təhlükəsizlik tədbirləri yenidən gündəmə gəlib. Sosial şəbəkə istifadəçiləri nümayiş etdirilən avtomobillərin hərəkətə hazır vəziyyətdə saxlanılmasını və uşaqların onlara nəzarətsiz daxil ola bilməsini ciddi təhlükəsizlik boşluğu kimi qiymətləndiriblər.
Qəzanın baş verdiyi Mercedes VLE alman istehsalçısının yeni nəsil tam elektrikli lüks minivenidir. Model limuzin rahatlığını çoxməqsədli ailə avtomobilinin funksionallığı ilə birləşdirir.
Avtomobil 115 kVt-saat tutumlu batareya ilə təchiz olunub və WLTP standartına əsasən, bir enerji doldurma ilə 700 kilometrə qədər məsafə qət edə bilir.
Almaniyada Mercedes VLE 300 modelinin başlanğıc qiyməti təxminən 70 735 avro, daha güclü və tamötürücülü VLE 400 4MATIC versiyasının qiyməti isə 78 450 avro təşkil edir.
Hadisə ciddi xəsarətlə nəticələnməsə də, avtomobil sərgilərində ziyarətçilərin təhlükəsizliyi və nümayiş avtomobillərinin idarəetmə sistemlərinə girişin məhdudlaşdırılması məsələsini aktuallaşdırıb.
