Dünyanın ən böyük avtomobil bazarı olan Çində istehsalçılar arasında rəqabət görünməmiş həddə çatıb. Şirkətlərin bazar payını artırmaq uğrunda mübarizəsi o qədər sürətlənib ki, ölkədə demək olar hər gün bir neçə yeni avtomobil təqdim edilir.
BYD-nin baş vitse-prezidenti He Zhiqi-nin açıqladığı məlumata görə, ilin ilk beş ayında Çində 542 yeni avtomobil modeli təqdim olunub. Bu isə orta hesabla gündə 3-4 yeni modelin bazara çıxması deməkdir.
Rəqabətin miqyasını göstərən ən maraqlı nümunələrdən biri iyulun 16-da yaşanıb. Sektor nümayəndələrinin “Çılğın cümə axşamı” adlandırdığı həmin gün səkkiz fərqli avtomobil istehsalçısı eyni gündə yeni modellərini təqdim edib.
Bu yüksək temp avtomobil şirkətləri üçün ciddi maliyyə yükü də yaradır. He Zhiqi-nin sözlərinə görə, tamamilə yeni avtomobil modelinin hazırlanmasına orta hesabla 1 milyard yuan, yəni təxminən 149 milyon dollar sərmayə tələb olunur.
Problem ondadır ki, bu qədər böyük investisiya ilə hazırlanmış modelin bazardakı populyarlığı çox qısa müddət davam edə bilir. Yeni avtomobil satışa çıxarıldıqdan sonra ilkin mərhələdə böyük maraq görsə də, cəmi bir neçə ay ərzində onlarla yeni rəqib modelin təqdim edilməsi həmin avtomobilə olan diqqəti azaldır.
Çin avtomobil istehsalçılarının ixracı sürətlə artsa da, daxili bazarda vəziyyət daha mürəkkəbdir. Yenilənmiş vergi təşviqlərinin də təsiri ilə ölkə daxilində ümumi avtomobil satışlarının 21 faiz, elektrik və hibrid avtomobillərin daxil olduğu NEV seqmentinin isə 13 faiz azaldığı bildirilir.
Bazarda yaşanan daralma böyük istehsalçılara da təsir göstərir. BYD-nin ilin ilk yarısında satışlarının 16 faiz azalması şirkət üçün son altı ildə ilk belə geriləmə olub. Great Wall Motor ilk yarımildə xalis mənfəətinin təxminən 60 faiz azalacağını gözləyir. Huawei ilə əməkdaşlığı ilə tanınan Seres Group-un isə dövrü zərərlə başa vuracağı bildirilir.
Nio-nun baş direktoru William Li hesab edir ki, Çin avtomobil bazarı artıq yeni mərhələyə daxil olur. Ölkədə bir çox ailənin artıq avtomobil sahibi olması səbəbindən bazarın əvvəlki kimi sürətlə böyüməsi çətinləşir. Bundan sonra əsas tələbin ilk avtomobilini alanlardan deyil, mövcud avtomobilini yenisi ilə əvəz edən istehlakçılardan gələcəyi gözlənilir.
Analitiklərin fikrincə, davam edən qiymət və model müharibəsi uzun müddət bu tempdə davam edə bilməz. Maliyyə imkanları zəif olan istehsalçıların bazardan çəkilməsi, şirkətlərin konsolidasiyası və nəticədə yeni avtomobillərin təqdimat sürətinin azalması gözlənilir.
