Avropa İttifaqının 5G şəbəkələrində Çin istehsalı olan, xüsusən də “Huawei” markalı telekommunikasiya avadanlıqlarından mərhələli şəkildə imtina etmək planı gözləniləndən qat-qat baha başa gələcək. Təqdim edilən yeni hesabatlara görə, Çinli tədarükçülərin Avropa şəbəkələrindən tamamilə çıxarılması qitə üçün nəhəng maliyyə yükü formalaşdıracaq. Belə ki, bu radikal addımın qiymətlərin kəskin artmasına və bazarda rəqabətin zəifləməsinə səbəb olacağı proqnozlaşdırılır.
GSMA-nın apardığı təhlillərə əsasən, şəbəkələrin yenidən qurulmasının ümumi maliyyəti 30 milyard ilə 40 milyard avro arasında dəyişə bilər. Xərclərin böyük bir qismi, təxminən 16-22 milyard avro mobil operatorların baza stansiyalarının və şəbəkə avadanlıqlarının yenilənməsinə sərf olunacaq. Şəbəkə qovşaqları arasındakı nəqliyyat infrastrukturunun təkmilləşdirilməsi üçün əlavə 9-12 milyard avro, sabit genişzolaqlı internet avadanlıqları üçün isə 5 milyard avro tələb ediləcək. Xatırladaq ki, Avropa Komissiyasının əvvəlki ehtimalları cəmi 10-13 milyard avro civarında idi və yeni rəqəmlər fərqin nə qədər böyük olduğunu göstərir.
“Huawei”dən uzaqlaşma strategiyası sadəcə operatorların büdcəsini deyil, bütövlükdə Avropanın telekommunikasiya bazarını sarsıda bilər. GSMA-nın məlumatlarına görə, Çin şirkətləri hazırda Avropa İttifaqının mobil şəbəkə avadanlıqları bazarının ən azı 25%-ni nəzarətdə saxlayır. Bu qədər böyük paya sahib olan təchizatçıların bazardan birdəfəlik kənarlaşdırılması təbii olaraq böyük bir texnoloji boşluq yaradacaq.
“Huawei” və digər Çin şirkətlərinin bazardan gedişi Avropanın yerli nəhəngləri sayılan “Ericsson” və “Nokia”nın mövqelərini gücləndirsə də, bunun istehlakçılar üçün mənfi nəticələri qaçılmaz olacaq. Rəqabətin azalması inhisarlaşma meyllərini gücləndirərək birbaşa qiymət artımına gətirib çıxaracaq. Təhlillər göstərir ki, yaxın gələcəkdə Avropada mobil rabitə xidmətlərinin qiyməti 24%-ə qədər, sabit xətt internetinin qiyməti isə təxminən 19% bahalaşa bilər.
