İnnovasiya və Rəqəmsal İnkişaf Agentliyi, Bakı Şəhəri Nərimanov Rayon İcra Hakimiyyəti və gənc startapları, şirkətləri, istedadlı şəxsləri bir araya gətirən innovasiya ekosistemi olan “Tedspace” şirkəti tərəfindən rəqəmsal transformasiyanı hədəfləyən “Openwave” hakatonlar seriyasının ilk tədbiri üçün qeydiyyat prosesi sürətlə davam edir.
Belə ki, bu genişmiqyaslı yarışmaya müraciət üçün son tarix 24 may 2026-cı il olaraq müəyyən edilmişdir.
“Openwave” hakatonu sadəcə bir yarışma deyil, paytaxtın mərkəzi rayonlarından biri olan Nərimanovda ərazi üzrə idarəetmənin optimallaşdırılması üçün texnoloji həllərin yaradılmasını hədəfləyən strateji bir platformadır. Proqramçılar, dizaynerlər və məlumat analitiklərindən ibarət komandalar 48 saat ərzində rayonun infrastruktur və idarəetmə problemlərinə innovativ baxış gətirəcəklər.
Bu çərçivədə iştirakçılardan aşağıdakı funksionallıqları ehtiva edən rəqəmsal həllərin hazırlanması tələb olunur:
- Sistematik nəzarət: Əraziyə planlı və marşrutlaşmış baxışın təmin olunması;
- Operativ qeydiyyat və yönləndirmə: Müəyyən edilmiş problemlər barədə təfərrüatlı məlumatların operativ qeydiyyatının aparılması və aidiyyəti qurumların nümayəndələrinə, məsul şəxslərə yönləndirilməsi;
- Əlçatan idarəetmə (Mobil tətbiq): Foto, geolokasiya və problem kateqoriyası funksiyaları vasitəsilə məlumatlanma və idarəetmənin əlçatanlığının təmin edilməsi;
- Analitik panellər: Rayonun canlı “vəziyyət xəritəsi”nin və interaktiv hesabatlılıq üçün əsaslı idarəetmə panelinin yaradılması;
- Rəqəmsal arxiv və audit: Problemlərin uçotu, rəqəmsal arxivləşdirilməsi, prioritetlərin müəyyən olunması və audit izləmə mexanizminin qurulması;
- İcra və statusun izlənməsi: Tapşırıqlar üzrə icraçının və obyektiv son icra tarixinin (deadline) təyin edilməsi, problemin tam həllinədək statusunun izlənməsi;
- Avtomatlaşdırılmış xəbərdarlıq: Gecikmələr halında sistem tərəfindən avtomatik xəbərdarlıqların göndərilməsi;
- Vahid koordinasiya: Rayon ərazisində fəaliyyət göstərən kommunal-təsərrüfat qurumlarının fəaliyyətinin koordinasiyası (su, qaz, elektrik enerjisinin verilməsində qəzalar, hava şəraiti ilə əlaqədar yaranmış hallar zamanı məlumatların nəzərə alınması ilə preventiv və operativ tədbirləri ehtiva edən sistemli fəaliyyət planı).
Təqdimatların yekununda münsiflər heyəti tərəfindən ən uğurlu rəqəmsal həlləri təqdim edən ilk 3 komanda seçiləcəkdir. Qaliblər üçün ümumi 10 000 AZN məbləğində mükafat fondu aşağıdakı qaydada bölünəcək:
- 1-ci yer: 5 000 AZN
- 2-ci yer: 3 000 AZN
- 3-cü yer: 2 000 AZN
