Süni intellekt məlumat mərkəzi bazarına hakim olan Nvidia ilə bağlı maraqlı bir iddia ortaya çıxıb. İddiaya görə, Nvidia böyük bir kompüter istehsalçısını əldə etmək üçün danışıqlar aparır. Hesabatda Nvidia-nın hansı şirkəti hədəf aldığı göstərilməsə də, bazar reaksiyası potensial namizədlərin Dell və ya HP ola biləcəyini göstərir.
Kompüter bazarı son vaxtlar çox yaxşı nəticə göstərmir. Süni intellektə doğru keçid və aparat təminatında çətinliklər istehsalçıların istehlakçı tələbatını canlı saxlamasını çətinləşdirib. Bu mühitdə SemiAccurate tərəfindən dərc edilən hesabatda Nvidia-nın kompüter və server sektorunda böyük bir satın alma planlaşdırdığı bildirilir. İddiaya görə, danışıqlar təxminən bir ildir davam edir və hazırda son mərhələyə yaxınlaşır. Bu şayiələrin arxasındakı ən güclü ehtimal, Nvidia-nın noutbuk prosessorları ilə bazara daha aqressiv giriş etməyə hazırlaşmasıdır. Bildirilir ki, şirkətin baş direktoru Jensen Huang-ın məqsədlərindən biri bu çipləri 150 milyona qədər cihazda görməkdir.
Əgər OEM satınalması baş verərsə, NVIDIA öz aparatlarından istifadə edərək sistemləri birbaşa dizayn edə və optimallaşdıra bilər. Bu, şirkəti sadəcə çip istehsalçısından birbaşa kompüter istehsalçısına çevirə bilər. Hələlik bu məlumat sadəcə fərziyyədir. Lakin, əgər doğrudursa, bu addım kompüter bazarının tarazlığını ciddi şəkildə dəyişdirə və Nvidia-nı çox fərqli bir vəziyyətə sala bilər.
