Dünyanın 200-dən çox şəhərində Google Developer Groups (GDG) icmaları tərəfindən hər il keçirilən DevFest tədbiri bu il 22 noyabr 2025-ci il tarixində GDG Baku tərəfindən ADA Universitetində təşkil olunacaq. DevFest Baku 2025-ə — 350-dən çox iştirakçı qeydiyyatdan keçərək tədbirdə iştirak hüququ qazanıb.
Açılış mərasimində bir sıra nüfuzlu qonaqların çıxışı gözlənilir. Onların arasında ABŞ Səfirliyinin İqtisadi Şöbə Rəhbəri Eric Groff, İDDA-nın sədri Fərid Osmanov, Fal şirkətində İnferensiya üzrə Software Mühəndisi Yigithan Yigit, XSOLLA şirkətinin Regional İcraçı Direktoru Fuad Kərimov, həmçinin aidiyyəti dövlət qurumlarının nümayəndələri yer alır. Onların çıxışları vasitəsilə iştirakçılar həm yerli ekosistemdəki inkişaflar, həm də qlobal texnoloji tendensiyalar barədə geniş məlumat əldə edəcəklər.
Açılışdan sonra iştirakçılar AI, Software və Workshop olmaqla üç istiqamət üzrə paralel sesiyalara qoşulacaq. Workshop xəttinə Data, Machine Learning, Cloud və Mobile kimi sahələrdə interaktiv təlimlər daxildir. Gün ərzində iştirakçılar istədikləri sessiyaya sərbəst keçid edə, fasilələrdə isə həm digər developerlərlə, həm də spikerlərlə ünsiyyət quraraq geniş networking imkanı əldə edə biləcəklər.
Bu il DevFest Baku 2025-də 20 spiker tərəfindən 18 çıxış təqdim olunacaq. Spikerlərdən 9-u 6 fərqli ölkədən olan Google Developer Expert-lərdir və onlar müasir texnologiyalar, sahədəki yeniliklər və real iş təcrübələri haqqında məlumat verəcəklər. Yerli spikerlər isə həm yerli, həm də beynəlxalq şirkətlərdə çalışan yüksək ixtisaslı mütəxəssislərdir.
Tədbir bu il 25 sponsorun dəstəyi ilə keçirilir. Onlar platinum, gold, silver, media və event partner kateqoriyalarında çıxış etməklə yanaşı, iştirakçılara 1000-dən çox müxtəlif hədiyyə, endirim və sınaq imkanları təqdim edəcəklər. Bununla yanaşı, 28 iştirakçı xüsusi təqaüd və endirim paketləri qazanacaq. Bura Holberton School tərəfindən təqdim olunan 10 nəfərlik 100% endirimli Python Back-End proqramı, JetBrains-in xüsusi vauçerləri, Matrix Academy-nin 1000 AZN-lik endirimləri, Bucard tərəfindən təqdim olunan 6 aylıq premium abunəlik, eyni zamanda Google Cloud krediti, Coffeein və Apar-dən promokodlar və Lingi App-in premium abunəlik imkanları daxildir.
Tədbirin sonunda hər bir iştirakçı rəsmi DevFest Baku 2025 badge-i əldə edəcək və bu badge-i LinkedIn kimi platformalarda paylaşa, həmçinin Google Developer Groups səhifələrinə əlavə edə biləcək. DevFest Baku 2025 ümumilikdə 7 saat davam edəcək və iştirakçılara həm bilik, həm təcrübə, həm də peşəkar əlaqələr qurmaq üçün geniş imkanlar yaradacaq.
