Rəqəmsal inkişaf və nəqliyyat naziri Rəşad Nəbiyev “PAŞA Holdinq” MMC-nin təşkilatçılığı ilə Bakıda keçirilən “INMerge” İnnovasiya Sammitində bir sıra vacib məsələlərə toxunub.
Onun sözlərinə görə, süni intellekt artıq sadəcə bir alət deyil, o, insanların həyatını, yaşayış tərzini və iş üslubunu yenidən formalaşdırır: “Rəqəmsal sahə və innovasiyaya ilə bağlı nəticələr tədricən ortaya çıxır. Onlar bütöv bir ekosistem tələb edir və əksər hallarda bu ekosistem bir nazirdən və ya möcüzə ilə ekosistemi dəyişə bilən bir insandan asılı deyil. Bu, məlumatlar, bacarıqlar, institutlar və eyni zamanda kapitalın mövcudluğu ilə bağlı məsələdir”.
Hazırda təxminən 2 milyon Azərbaycan vətəndaşı “MyGov” platformasından aktiv istifadə edir: “Biz yaxın aylarda ABŞ şirkəti ilə birgə “MyGov Biznes Platforması”nı istifadəyə verəcəyik. Bu da bizneslərimizə bütün dövlət xidmətlərinə bir pəncərədən tam giriş imkanı verəcək”.
O həmçinin qeyd edib ki, SİMA biometrik imzası hazırda təxminən 3,3 milyon aktiv istifadəçiyə malikdir və Azərbaycan bu texnologiyanı gündəlik həyatında aktiv şəkildə istifadə edən az sayda ölkələrdən biridir”.
Əlavə olaraq yaxın günlərdə Beynəlxalq Telekommunikasiya İttifaqı (ITU) ilə birlikdə Azərbaycanda Akselerasiya Mərkəzini açılacaq: “Bu təkcə bizim üçün deyil, həm də MDB regionu, Mərkəzi Asiya və Cənubi Qafqaz üçün unikal olacaq. Buna görə qlobal texnologiya şirkətləri Azərbaycanı öz təyinat məkanları olaraq seçirlər”.
Azərbaycan universitetlərinin İKT sahəsi ilə bağlı məzunlarının keyfiyyəti ilə bazar tələbləri arasında böyük uyğunsuzluq var: “Düşünürük ki, buna təsir edən amillərdən biri bu sahə ilə bağlı kadrlarla əlaqədardır. Hər il Azərbaycan universitetlərini 2 000-dən çox İT mütəxəssisi bitirir. Əslində bu, bazarın tələb etdiyindən daha çoxdur”.
R.Nəbiyev bildirilib ki, lakin əsas problem məzunların keyfiyyəti ilə bazar tələbləri arasında böyük uyğunsuzluğun olmasıdır: “Biz insan kapitalına demək olar ki, bütün səviyyələrdə intensiv şəkildə investisiya qoyuruq. Məktəblərdə rəqəmsal bacarıqlar proqramımızı genişləndiririk. Universitet proqramlarını bütün universitetlərdə yüksəldirik və eyni zamanda artıq bir çox şirkətlərlə əməkdaşlıqda işçi qüvvəsinin bacarıqlarını artırırıq”.
