WhatsApp tətbiqinə gələn yeniliklər arasında ən çox bəyəndiyiniz şey nədir sualını versək yəqin ki, çoxlarından “emojilərlə verilən reaksiyalar” cavabını alarıq. Çünki, kimsə bizə mesaj yazdıqda bəzən həmin mesaja cavab yazmadan öz fikrimizi ifadə etmək istəyirik. Yaxın vaxtlara qədər belə bir imkan olmasa da, 1 aya yaxındır göndərilən yeniləmə artıq hamıya emojilərlə reaksiya vermə xüsusiyyətini qazandırıb. İndi isə, bu yeniliyin biraz da təkmilləşdirilməsinə ehtiyac var. Belə ki, WABetaInfo tərəfindən verilən məlumata görə yaxın vaxtlarda WhatsApp tətbiqi mesajlara istənilən emoji ilə reaksiya verməyi dəstəkləyəcək.
WhatsApp hal-hazırda emoji ilə reaksiya yeniliyini Android və iOS cihazlarda test edir
WABetaInfo, tətbiqin iOS və Android cihazlar üçün hazırlanmış beta variantından yeni görüntülər paylaşıb. Görüntülərdən də gördüyünüz kimi mesaja toxunduqda indi mövcud olan emojilərin yanına “+” düyməsi əlavə olunub. Həmin düyməyə toxunduqda smartfondakı bütün emojilərlə reaksiya verə biləcəksiniz. WhatsApp qarşıdan gələn həftələrdə daha çox beta istifadəçisi üçün bu xüsusiyyəti aktivləşdirəcək. Yəqin ki, yaxın 1-2 ay ərzində yenilik hər kəs üçün istifadəyə verilmiş olacaq.
Yeniliklər bununla bitmir. Şəkillərin müəyyən bölümünü rəngləyərək qapatmaq bəzən əlverişli olmur deyə WhatsApp öz redaktoruna bulanıqlaşdırma aləti əlavə edəcək. Android cihazlar üçün 4 aydan çoxdur beta versiyasında qalan xüsusiyyət WhatsApp Web üçün də test edilməyə başlanılıb. Böyük bir ehtimalla Web üzərindəki təkmilləşdirmələr də başa çatdıqdan sonra bütün platformalarda bu yenilikdən yararlana biləcəyik.
Əgər xəbəriniz yoxdursa xatırladaq ki, 2 həftə əvvəl WhatsApp tətbiqinə gələn yeniləmə məxfiliyinizlə bağlı geniş imkanlar gətirib. Profil şəklinizi, haqqında və status bölümünüzü istədiyiniz şəxslərə ayrı-ayrılıqda açıb bağlamaq mümkündür. Eyni zamanda son görülmə statusunuzu da müyyən şəxslərə görə məhdudlaşdıra bilərsiniz. WhatsApp rəqabətdə önə çıxmaq üçün son zamanlar tətbiqin imkanlarını həqiqətən xeyli genişləndirib.
Aşağıdan “WhatsApp yeni əlavələr edir: Profil şəklinizə hər kəs baxa bilməyəcək!” xəbərinə keçid edərək daha çox məlumat ala bilərsiniz. Bəs siz bu barədə nə fikirləşirsiniz? Sizcə doğurdan da bütün WhatsApp mesajlarına emoji ilə reaksiya verməyə ehtiyac var? Fikirlərinizi bizimlə şərh hissəsində bölüşməyi unutmayın.
