Amerika tərəfindən edilən sanksiyalara görə Huawei brendi smartfon bazarında xeyli kiçilsə də sektoru qətiyyən tərk etmək istəmir. Daha çox Snapdragon 7XX və Snapdragon 6XX seriyası çipsetli modellər təqdim etməyə yönələn firma premium smartfonlardan biraz uzaqlaşıb. Təbii ki, alıcı kütləsinin azalması, yeni nəsil texnologiyaların təkmilləşdirilməsinin çətin olması, çipset təminatının yoxluğu kimi səbəblər şirkəti uzaqlaşmağa məcbur edir. Lakin insayderlər və bəzi mənbələrin verdiyi məlumata görə Huawei yeni flaqman smartfonunu təqdim etməyə hazırlaşır. Söhbət Huawei Mate 50 seriyasından gedir.
2 il əvvəl anons edilmiş Mate 40 seriyasının, ən son yenilənmiş nümayəndəsi ötən il Kirin 990E çipseti ilə təqdim edilən Mate 40E olmuşdu. Mate 50 seriyası isə Qualcomm istehsalı ən yeni çipsetlərdən birini əldə edərək yüksək performans verəcək.
Huawei Mate 50 seriyasında bizi nələr gözləyir?
Belə ki, Huawei Mate 50 modeli kommersiya fəaliyyəti ilə məşğul olan bir saytın verilənlər bazasından sızdırılıb. İddialara görə bu smartfon öz gücünü Qualcomm-un Snapdragon 8 Gen 1 çipsetindən alacaq. Sanksiyalardan sonra çıxarılmış smartfonlar indiyə qədər 5G bağlantısını dəstəkləməsə də verilənlər bazası bu modeldə 5G bağlantısının olduğunu göstərir. Ola bilsin ki, şirkətin hazırladığı 5G xüsusiyyətini dəstəkləyən kaburo bağlantı texnologiyasının təminatına imkan yaradır. Amma fərqli bir ehtimal da var. Həmin ehtimal isə Huawei-in 5G üçün cihaza ikinci bir çip, “modem” quraşdırmasıdır.
Mate 50 modelinin Snapdragon 8 Gen 1 versiyasından əlavə fərqli bir Kirin 9000s sahib variantı da mövcuddur. Kirin 9000s çipsetli variantının yalnız Çində satışa çıxarılacağı və ya prototip olduğu düşünülür. Çünki, performansı Snapdragon 8 Gen 1 ilə müqayisədə çox aşağıdır.
Huawei Mate 50 modeli 6.28-6.38 düym aralığında 120Hz tezlikli, 2800×1225 təsvir ölçülü AMOLED ekranla təchiz ediləcək. Əgər doğrudursa xeyli kompakt cihaz olduğunu demək mümkündür. Arxa tərəfdə konseptdə gördüyünüz kimi 3 ədəd kamera sensoru quraşdırılacaq. Kamera parametrləri barədə detallar mövcud deyil.
Yalnız 128GB və ya 256GB yaddaş variantlarına sahib olacaq. Operativ yaddaş isə hər iki yaddaş seçimi üçün 8GB təşkil edəcək. Qeyd edək ki, həqiqi dizaynın konsept görüntüsünə çox yaxın olacağı düşünülür. Amma bütün bu yazılanların nə qədər doğru olduğu barədə əmin deyilik. Təqdimat ehtimallara görə 12 sentyabr tarixində baş tuta bilər.
