Elon Musk, xAI-nin yeni çatbotu Grok 3-ün mövcud süni intellekt alətlərini üstələmək üçün kifayət qədər güclü olduğunu açıqlayıb. Qeyd edək ki, Elon Musk tərəfindən “Dünyanın ən ağıllı süni intellekti” adlandırılan Grok 3-ün istifadəyə veriiləcəyi tarix də dəqiqləşdirilib.
Beləliklə, Elon Musk-ın süni intellekt şirkəti xAI, Grok 3 çatbotunun istifadəyə verilməsi üçün günlər saymağa başlayıb. Süni intellekt dünyasında diqqət çəkməsi gözlənilən model bazar ertəsi keçiriləcək nümayişdə ictimaiyyətə təqdim olunacaq. xAI tərəfindən hazırlanmış Grok 3 sintetik məlumatlarla öyrədilib və buraxdığı səhvləri təhlil etmək və düzəltmək bacarığı qazanıb. Elon Musk bu modeli “dünyanın ən ağıllı süni intellekti” olaraq xarakterizə edərək, mövcud süni intellekt vasitələrini geridə qoyacağını inamlı şəkildə ifadə edib. Qeyd edək ki, Grok 3-ün elanı Dubayda keçirilən Dünya Hökumət Sammitində videokonfrans zamanı paylaşılıb.
Yeni çatbotun təqdimatı daha təkmil və sərfəli süni intellekt həllərinin inkişaf etdirilməsi yarışının sürətləndiyi bir vaxta təsadüf edir. Çində yerləşən DeepSeek AI modeli , OpenAI-nin ChatGPT modeli ilə müqayisə edildikdən sonra böyümə ambisiyalarını sürətləndirdiyi üçün işə qəbulu sürətləndirir. Ümumiyyətlə, Elon Musk və OpenAI-nin həmtəsisçisi Sam Altman uzun müddətdir ki, şirkətin gələcəyi ilə bağlı fikir ayrılığı yaşayırlar. Xatırladaq ki, onların hər ikisi OpenAI-ni 2015-ci ildə qeyri-kommersiya təşkilatı kimi təsis etmişdilər. Lakin daha sonra Elon Musk idarə heyətinin qərarları ilə razılaşmadığı üçün şirkətdən ayrılaraq öz süni intellekt şirkəti xAI-ni yaradıb.
