Ötən ilin ən çox diqqətçəkən xəbərlərindən biri də Elon Musk-ın öz X platformasından Starlink internetinin birbaşa telefonlara gələcəyi xəbəri idi. Belə ki, Starlink artıq bununla bağlı hərəkətə keçir. Yeni ortaya çıxan hesabatda deyilir ki, Apple iPhone-lara Starlink peyk şəbəkəsi dəstəyini gətirmək üçün SpaceX və T-mobile ilə işləyir. Belə ki, bu yaxınlarda yayımlanan iOS 18.3 yeniləməsi ilə Starlink seçilmiş iPhone istifadəçiləri üçün aktivləşdirilib.
iPhone istifadəçiləri Apple-ın öz peyk rabitəsi xidmətinə alternativ olaraq Starlink-dən istifadə edə biləcəklər. T-Mobile az sayda iPhone istifadəçisi ilə Starlink xidmətinin ilkin versiyasını sınaqdan keçirməyə başlayıb. Starlink-in ilk versiyası yalnız mesajlaşma üçün əlçatan olacaq. Lakin SpaceX və T-Mobile onun gələcəkdə məlumat bağlantıları və səsli zənglər üçün də istifadə oluna biləcəyini bildirib. Proqram həm də hələlik yalnız ABŞ-dakı istifadəçilər üçün əlçatandır. Apple-ın Globalstar xidməti daha bir çox ölkədə mövcuddur. SpaceX Starlink-i qlobal miqyasda yaymağı planlaşdırır.
Qeyd edək ki, SpaceX şirkətinin Starlink peyk internet şəbəkəsi artıq 100-dən çox ölkəni və ərazini əhatə edən ən böyük peyk rabitəsi xidmətləri təminatçısıdır. Bununla belə, nə SpaceX-in Starlink, nə də Apple-ın iPhone 14 seriyasından bəri mövcud olan peyk əlaqəsi xüsusiyyəti hələlik Azərbaycanda istifadə edilə bilməz. Lakin, ötən günlərdə xəbər verdiyimiz kimi, Starlink öz saytında Azərbaycana peyk internet şəbəkəsinin 2025-ci ilin birinci rübündə gələcəyini xəbər verir.
