Sony fevral ayında Blu-ray Disc (BD) optik media istehsalını dayandıracağını açıqlayıb. Bu qərar Blu-ray formatının davamçısı olmayacağından şirkətin ümumilikdə optik disk istehsalının başa çatması mənasına gəlir. Beləliklə, Sony şirkəti bir dövrün əfsanəsinə çevrilən optik diskləri artıq istehsal etməyəcək və sonuncu zavodu bağlayacaq. Dayandırılma qərarı isə MiniDisc, MD Data və MiniDV lentləri kimi mediaya da təsir edəcək.
Qeyd edək ki, Sony əvvəllər 2024-cü ilin ortalarında istehlakçı BD-lərinin və digər optik disklərin istehsalını dayandırmışdı. Habelə, biznes və korporativ müştərilər üçün optik media istehsal xətləri hələ də davam edirdi. İndi isə texnologiya inkişaf etdikcə, məhsul satışı Sony-nin optik media biznesini gəlirli saxlamaq üçün artıq kifayət etməyib. İlk dəfə 2000-ci ildə qarşımıza çıxan BD optik mediası DVD-nin davamçısı kimi hazırlanmış və bir müddət Toshiba tərəfindən təqdim edilən HD DVD formatı ilə rəqabət aparmışdır.
BD və HD DVD 2006-cı ildə prototip mərhələsindən kütləvi istehsal mərhələsinə keçid edərək əfsanəyə çevrilməyə başlamışdı. Belə ki, HD DVD Sony-nin kinostudiyalarla tərəfdaşlığı və PlayStation 3 oyun konsolunda Blu-ray texnologiyasını dəstəkləməsi səbəbindən format müharibəsində məğlub olmuşdu. Bu gün, BD-ləri müxtəlif onlayn platformalardan almaq olar, lakin bir müddət sonra mağazalarda və platformalarda inventar tükənəcək. İlk baxışdan sürətli genişzolaqlı və sərfəli bulud xidmətləri dövründə BD-lərin məhvi ciddi problem kimi görünmür. Ancaq unutmamalıyıq ki, bulud yaddaşı aylıq ödəniş tələb edir, istənilən vaxt istifadəçi müqaviləsini dəyişə bilər və ya sadəcə mövcudluğunu dayandıra bilər.
Arxivləri sabit disklərdə saxlamaq kifayət qədər etibarlı deyil – illər sonra bəzi sərt disklər oxunmaz hala gələ bilər ki, bu da musiqi sənayesinin son vaxtlar getdikcə daha tez-tez qarşılaşdığı vəziyyətdir. Optik media düzgün saxlandıqda məlumatları onilliklər ərzində saxlaya bilir və bu, uzunmüddətli soyuq saxlama üçün idealdır. Bəlkə də buna görə bütün istehsalçılar onların istehsalını dayandırmağa hazır deyillər. Beləliklə, Blu-ray disklərinin sonu istifadəçilərin arxivləşdirilmiş məlumatları fiziki olaraq saxlaya, ehtiyat nüsxələrini yarada və ya sevimli filmlərinin media kitabxanasını qura biləcəkləri dövrün sonunu göstərir.
