Rebrendiq edən SanDisk brendi 1995-ci ildən bəri istifadə etdiyi ənənəvi loqonu dəyişib. Şirkət “tək məlumat nöqtəsi” və ya “piksel”dən ilhamlanan yeni loqotipini elan edib. Sandisk bildirir ki, onun yeni loqosu qalın və bucaqlı “slab serif” şriftindən ilhamlanıb. Əvvəlki loqoda olduğu kimi açıq D hərfini saxlayaraq, yeni loqoda alt tərəfi kəsilmiş piksel yönümlü S hərfləri də var.
Qeyd edək ki, keçən il Western Digital, sahibi olduğu NAND yaddaş bloku SanDisk ilə sabit disklər istehsal edən ana şirkəti ayırmaq planlarını açıqlamışdı. Son aylarda isə iki şirkətin veb saytları da ayrılıb. WD böyümək üçün mübarizə aparan NAND yaddaş bölməsini ana şirkətdən ayıraraq daha çevik və rəqabətli etməyi planlaşdırır. Habelə, SanDisk brendinin uzun müddətdir istifadə etdiyi loqonu dəyişməsi də bu rebrendinq prosesinin bir addımı hesab edilə bilər.
Ümumiyyətlə, SanDisk 1988-ci ildə Eli Harari, Sanjay Mehrotra və Cek Yuan tərəfindən təsis edilib. Belə ki, anDisk-in həmtəsisçisi Eli Harari, yarımkeçirici əsaslı məlumatların saxlanmasının praktikliyini, etibarlılığını və davamlılığını təkmilləşdirən Floating Gate EEPROM-u inkişaf etdirib. 1991-ci ildə SanDisk IBM üçün ilk flaş SSD-ni, 20 MB tutumlu 2,5 düymlük sabit diski istehsal etməyi bacarıb, hansı ki, bunun qiyməti təxminən 1000 dollar hesab olunurdu. 10 may 2000-ci ildə Toshiba və SanDisk Corporation xüsusi olaraq rəqəmsal kameralar üçün təkmil portativ yaddaş həlləri istehsal etmək üçün yeni yarımkeçirici şirkət yaradacaqlarını elan etmişdilər. Bununla belə, SanDisk 12 may 2016-cı ildə 19 milyard dollar dəyərində müqavilə ilə Western Digital tərəfindən alınıb.
