Bu gün ortaya çıxan yeni iddiaya görə, Çin mərkəzli texnologiya nəhəngi Xiaomi 2025-ci ildə uzun müddətdir ki, inkişaf etdirdiyi 3nm çipsetlərini təqdm edə bilər. Belə ki, ötən aylarda da Xiaomi-nin 3nm əsaslı prosessor hazırladığı iddia edilmişdi.
Çinin ilk 3nm əsaslı prosessoru olduğu bildirilən bu texnologiya, yeni iddialara görə, 2025-ci ildə Xiaomi rəsmi olaraq təqdim oluna bilər. Hələlik texniki detalları verilməyən “mobil” prosessor 2025-ci ilin sonunda və ya 2026-cı ildə smartfon və ya planşetlərdə istifadə oluna bilər. Beləliklə, Xiaomi brendi də Çinli həmkarı Huawei-nin strategiyasından istifadə edəcək. Xatırladaq ki, Huawei brendi daha əvvəl qarşılaşdığı müxtəlif sanksiyalara görə öz prosessorunu hazırlamağa məcbur olmuşdu. Məhz bu prosessor ilə şirkət bütün diqqətləri öz üzərinə cəlb etməyi bacarmışdı.
Əslində Xiaomi brendinin prosessor tərəfində nəzərdə tutduğu yeniliklər sadəcə bununla kifayətlənmir. Belə ki, şirkət Surge S1 adlı ilk prosessorunu illər əvvəl Mi 5c modelində istifadə edərək, daha sonra Surge S2 üzərində işləməyə başlamışdı. Hətta prosessorun bəzi texniki detalları da paylaşılıb. Daha əvvəl, Surge S2-nin TSMC-nin 16 Nm istehsal prosesindən çıxacağı və səkkiz nüvəli aparatın 2,2 GHz tezliyində işləyən dörd Cortex-A73 nüvəsi və 1,8 GHz tezliyində işləyən dörd Cortex-A53 nüvəsi üzərində qurulacağı bildirilmişdi. Prosessorun GPU tərəfində Mali G71 MP8 istifadə etdiyi, həmçinin LPDDR4 RAM və UFS 2.1 yaddaşını dəstəklədiyi də ortaya çıxmışdı. Lakin bu prosessor heç vaxt şirkətin smartfon modellərində istifadə edilməyib. Daha sonra Xiaomi-nin öz prosessorunu istehsal etmək fikrindən tamamilə imtina etdiyi xəbəri gündəmə gəldikdə, baş direktor Lei Jun Surge seriyalı prosessorların hələ də şirkətin məqsədləri arasında olduğunu bildirmişdi.
