Yekun hesabatlar göstərir ki, BMW brendi əzəli rəqibi Mercedes-i elektromobil satışları tərəfində qabaqlamağı bacarıb. Belə ki, bu il BMW elektrikli avtomobil satışlarını 19% artırdığı halda, Mercedes-in satışları 22% azalıb.
Mini brendi də daxil olmaqla, BMW Group şirkətlər qrupu, 2024-cü ilin üçüncü rübündə keçən ilin eyni dövrü ilə müqayisədə 10% artımla 103440 elektrikli avtomobil satıb. Şirkət ilin ilk 9 ayında isə 294 mindən çox elektrikli avtomobil sataraq satışlarını əvvəlki ilə nisbətən 19% artırıb. Xüsusilə Avropa bazarında satışlarını əhəmiyyətli dərəcədə artıran BMW, rəqiblərindən daha çox bazar payını ələ keçirməyi bacarıb. Avropada BMW markası 2024-cü ilin ilk 9 ayında keçən illə müqayisədə 35,8% artımla 121 844 avtomobil tədarük edib. BMW-nin iX1 və i4 modelləri artımda ən əhəmiyyətli paya sahib olan modellər olub. Jato Dynamics araşdırmasına görə, BMW-nin Avropada elektrikli avtomobil satışları 2024-cü ilin iyulunda ilk dəfə Tesla-nı ötüb.
BMW-nin ən böyük rəqibi olan Mercedes üçüncü rübdə 46 900 elektromobil satışı qeydə alıb. Bu rəqəm ikinci rüblə müqayisədə 8%, ötən ilin müvafiq dövrü ilə müqayisədə isə 31% azalma deməkdir. Mercedes-in elektrikli avtomobil satışları 2024-cü ilin ilk 9 ayında 22% azalaraq 148.500 ədədə düşüb. Qeyd edək ki, elektrikli avtomobillərlə bağlı uğurlarına baxmayaraq, BMW-nin ümumi satışları üçüncü rübdə 13% azalaraq 540 882 təşkil edib. Xüsusilə, üçüncü rübdə Çində satışlar kəskin (30%) azalaraq 147 691 ədədə düşüb. Mercedes-in Çində satışları da keçən illə müqayisədə azalıb.
