Çinin ən böyük avtomobil istehsalçısı BYD, rekord qıran uğurdan sonra təxminən 100 min elektrikli Dolphin və Yuan Plus avtomobilini yanğın riski səbəbiylə geri çağırır. Qeyd edək ki, geri çağırılma prosesi artıq dünəndən başlayıb.
Çin Dövlət Bazar Tənzimləmə İdarəsindən (SAMR) verilən açıqlamaya görə, geri çağırma istehsal prosesindən irəli gələn potensial təhlükəsizlik problemi ilə əlaqədardır. Bu geri çağırma əməliyyatı iki ayrı BYD təşkilatı tərəfindən həyata keçiriləcək. BYD Auto Industry Co. Ltd 4 fevral 2023-cü il və 26 dekabr 2023-cü il tarixləri arasında istehsal olunmuş 87 762 Dolphin və Yuan Plus model elektrik avtomobilini geri çağıracaq. Eyni zamanda, BYD Auto Co. Ltd.-nin 2 noyabr 2022-ci il və 19 iyun 2023-cü il tarixləri arasında istehsal olunmuş 8952 Yuan Plus model avtomobilini geri çağıracağı bildirilib. Maraqlısı budur ki, hər iki model şirkətin 2023-cü ildə ən çox satılan modelləri olub.
Məlumatlara görə, geri çağırılan avtomobillərdə sükan yardımı sisteminin (CEPS) idarəedicisindəki kondansatorlarda mikro çatlar yarana bilər. Bildirilir ki, bu çatlar zamanla böyüyə və qısaqapanmaya səbəb ola bilər ki, bu da kondansatorların həddindən artıq istiləşməsinə və hətta yanğına səbəb verə bilər. BYD, potensial təhlükəsizlik problemini aradan qaldırmaq üçün səlahiyyətli dilerləri vasitəsilə avtomobillərə əlavə material yerləşdirməklə bu problemi pulsuz həll edəcək. Xatırladaq ki, aprel ayında BYD Çində 16 666 Seagull model elektrik avtomobilini proqram təminatı probleminə görə geri çağırmışdı. Habelə, BYD, avqust ayında 373.083 elektrikli avtomobil (EV, PHEV, HEV) sataraq satış rekordu qırmış və illik 35.87% artım əldə etmişdi.
