Samsung bu dəfə Xiaomi, Redmi və digər smartfon istehsalçıları ilə orta-büdcəli smartfon bazarında rəqabəti artırır. Belə ki, Cənubi Koreya mərkəzi Samsung indi orta-büdcəli smartfonlarını da flaqman cihazlar kimi 6 il yeniləyəcək. Xatırladaq kİ, sərfəli qiymətə təklif olunan smartfonlar daha əvvəl yalnız 2 il yenilənmə alırdı.
Bir neçə il əvvəl yalnız Apple öz smartfonları üçün ən uzun proqram dəstəyi ilə öyünə bilirdi, lakin indi Samsung və Google öz flaqmanları üçün eyni dərəcədə uzun dəstək proqramları təklif edirlər. Bundan əlavə, Samsung indi Xiaomi, Redmi və digər sərfəli smartfon istehsalçılarına zərər verə biləcək addım atmağa hazırlaşır. Beləliklə, Samsung orta-büdcəli smartfonlarını nə az, nə çox 6 il yenilənmə dəstəyi ilə bazara çıxaracaq. İnternetdə dərc olunan marketinq materiallarına əsasən, Samsung şirkətinin 6 illik yenilənmə dəstəyi ilə təklif edəcəyi ilk büdcə modeli Galaxy A16 5G olacaq. Habelə, bu smartfon Android 14 ilə qutudan çıxsa da, Android 20 yenilənməsini belə əldə edəcək.
Marketinq materialları Galaxy A16 5G-nin əsas xüsusiyyətlərini də ortaya çıxarıb. Belə ki, bu cihaz Full HD+ təsvir ölçüsünə və 90Hz yenilənmə tezliyinə malik 6,7 düymlük Super AMOLED displeyə sahib olacaq. Exynos 1330 çipsetindən güc alan smartfon 4, 6 və ya 8 GB RAM və 128, 256 GB yaddaş seçimlərinə sahib olacaq. Smartfonun digər xüsusiyyətləri arasında isə 5000 mAs batareyası yer alır. IP54 sertifikatına sahib olan cihazın çəkisi 200 qram ölçüləri isə 164,4 x 77,9 x 7,9 mm olacaq. Smartfonun nə zaman təqdim ediləcəyi isə hələlik məlum deyil.
