Film zövqlərimiz fərqli olsa da hərdən hər birimiz eyni tərzdə bizi həyəcanlandıracaq filmlər izləmək istəyirik. Əgər sizdə bu tərz fimlər izləmək istəyirsinizsə siyahımızdakı filmləri çox sevəcəksiniz. Həftəsonu, işdən və ya dərsdən sonra izləməyə film axtarırsınızsa aşağıda qeyd edilən filmləri mütləq izləməlisiniz.
İndi isə siyahımıza keçid alaq!
MIRAGE
Mirage 2018-ci ilə aid ispan filmidir və orijinal adı Durante La Tormenta-dır. Filmdə Vera Roy və David Ortiz adlı cütlüyün yeni evlərinə köçdüyü ilk gün baş verən fırtına ilə başlayan fantastik hadisələr təsvir edilir. Gənc tibb bacısı olan Vera yeni evlərində televizor və kamera tapır. Çöldəki böyük fırtınanın təsiri ilə gənc qadın 25 il əvvəl eyni evdə yaşayan və fırtınada ölən Niko Lasarte ilə əlaqə qurur. Niko Lasartenin başına gələcəklərdən xəbərdar olan Vera onun həyatını xilas edir, lakin bunu etməklə o başqa bir zamana oyanır və ailəsini itirdiyini görür. Köhnə həyatına qayıtmağa çalışan Veranın sonda öyrəndiyi gerçəklər isə sizi çox təəccübləndirəcək.
DON’T BREATHE
Dilimizə ”Nəfəs alma” olaraq tərcümə edilən bu film kor yaşlı adamın evinə girib oğurluq etmək istəyən 3 gəncdən bəhs edir. Bacısı və özü üçün daha yaxşı bir həyata başlamaq istəyən Rocky, Money və Alex ilə zəngin kor adamın evinin qarətində iştirak etmək üçün razılaşır. Mövzu bəsit görünsə də həmin evdə yaşananları izlədikcə sizdə filmin adına əməl edəcəksiniz. Çünki evlərinə girdikləri yaşlı adam çox təhlükəli biridir və bu səbəbdən işlər gənclərin planladığı kimi getmir.
ORPHAN (film)
Film Kate və John adlı valideynlərin 9 yaşlı Esther-i övladlığa götürməsindən bəhs edir. Yeni ailəsi ilə tanış olan Esther əslində göründüyü kimi biri deyil. Məktəbdə onu lağa qoyan kiçik qızın ayağını oyun meydançasında qırır, ətrafına zərər verir və artıq cinayət törətməyə başlayır. Bunlardan narahat olmağa başlayan Kate ailəsinin təhlükəsizliyi üçün Esther-in maskasının altındakı üzü John-a və digərlərinə göstərməyə çalışsada ona məhəl qoymurlar. Lakin kiçik qız kimi görünən Esther-in maskası açılanda hər şey üçün gec olur.
