Huawei, sənayenin ilk üç dəfə qatlanan smartfonunu təqdim etməyə hazırlaşır. Lakin, qatlanan smartfonların olduqca bahalı qiymətə başa gəldiyi bu günlərdə Huawei üç dəfə qatlanan smartfon modelini 4 min dollara təklif edə bilər. Təbii ki, smartfonun bu qədər baha olması ona sahib olmaq istəyən istifadəçiləri də narahat etməyə başlayıb.
Əvvəllər Huawei-nin üç qatlanan smartfon üzərində işlədiyini və belə bir cihazı təqdim edən ilk istehsalçı olmaq istədiyi barədə məlumat vermişdik. Lakin son xəbərlər bu cihaza sahib olmaq istəyənlərin sayına ciddi təsir edə bilər. Belə ki, Üç dəfə qatlanan Huawei modeli 4 min dollara bazara çıxa bilər. X platformasından Jasonwill adlı istifadəçi Huawei-nin cihazın qiymətini azaltmağa çalışdığını və smartfonun mühəndislik nümunəsinin 4900 dollar civarında başa gəldiyini iddia edib. İstifadəçi qeyd edib ki, üç dəfə qatlanan smartfonun kütləvi istehsal versiyasının qiyməti 4000 dollar ola bilər.
Ümumiyyətlə, üç dəfə qatlanan smartfon sənayedə ilk olacağından və az miqdarda istehsal ediləcəyindən onun istehsal xərclərinin yüksək olması gözləniləndir. Ancaq qeyd etmək lazımdır ki, bu, hələ də insanların çoxunun narahat olacağı qədər yüksək məbləğ ola bilər. Xatırladaq ki, Huawei-nin üç dəfə qatlanan smartfonu bu yaxınlarda şirkətin Consumer Business Group-un baş direktoru Richard Yu-nun əlində görünmüşdü. Görünən bu cihazın istehsaldan əvvəlki versiya olması güman edilir. Çünki, bu günə qədər smartfonun kütləvi istehsala daxil olması ilə bağlı xəbər paylaşılmayıb.
