ABŞ prezidenti Joe Biden, bağlanan və ya bağlanmağa yaxın olan avtomobil fabriklərini elektrikli avtomobil zavodlarına çevirəcək yeni layihəni təsdiqləyib. Beləliklə, ABŞ qapadılan bütün fabrikləri elekrikli avtomobillər üçün yenidən açacaq.
Son zamanlar elektromobil bazarında rəqabət kifayət qədər ciddiləşib. İş o yerə çatıb ki, şirkətlərin rəqabətinə dövlət idarəçiləri də daxil olub. Xüsusilə ucuz modelləri ilə bazarı zəbt edən Çin istehsalçılarına çoxlu əlavə vergilər qoyulub. Bütün bu addımlardan sonra isə ABŞ bu sahədə yeni addım atmağa hazırlaşır. ABŞ Hökuməti 8 ştatda yerləşən cəmi 11 avtomobil fabrikinin yenilənməsi ilə bağlı layihəni təsdiqləyib. ABŞ artıq qapadılan fabrikləri və ya qapanmaqda olan fabrikləri elektromobillər üçün yenidən açacaq.
Ağ Ev rəsmilərinin açıqlamasına görə, bu fabriklər yenilənmə prosesi başa çatdıqdan sonra elektrik motosikletləri, avtobuslar, hibrid güc blokları, ağır yük maşınları üçün batareyalar, həmçinin elektromobillər istehsal edəcək. Mövzu ilə bağlı açıqlama verən Biden, təmiz enerji iqtisadiyyatının həm istehsalçılara, həm də işçilərə fayda verəcəyini bildirib. Digər tərəfdən, dəstəyin şərtlərinə fabriklərdə həmkarlar ittifaqına qoşulan işçilərin sayının artırılması və sektorda yeni həmkarlar ittifaqı iş yerlərinin yaradılması daxildir. Qeyd edək ki, ABŞ prezidenti 2022-ci ildə təmiz enerji və elektrikli avtomobil investisiyalarını artıracaq fərman imzalamışdı. Məhz yeni layihə də bu fərman çərçivəsində hazırlanıb və təsdiqlənib.
