Nothing brendi, CMF brendi altında daha sərfəli qiymətə CMF Phone 1 smartfonunu rəsmi olaraq təqdim edib. Büdcəyə uyğun smartfon asanlıqla dəyişdirilə bilən arxa qapaq və müxtəlif aksessuarlarla gəlir. Məhz bu smartfonu digərlərindən fərqləndirən əsas xüsusiyyətlərindən biri də dəyişdirilə bilən arxa qapağıdır. Əslində bu xüsusiyyət smartfon sənayesi üçün yeni deyil. Lakin son illərdə təqdim edlən demək olar ki, bütün smartfonlar da arxa qapaq smartfonun gövdəsinə birləşdirilir. Batareya yeniləndikdə isə arxa qapaq gövdədən sökülür.
Nothing şirkətinin alt-brendi olan CMF isə ilk smartfonu olan CMF Phone 1 ilə bütün diqqətləri çəkməyi bacarıb. 8 İyul tarixində rəsmi olaraq elan edilən və bizlərə təqdim edilən cihaz uzun müddətdir görmədiyimiz dəyişdirilə bilən arxa qapağa malikdir. Qeyd edək ki, CMF Phone 1 modeli 6,67 düym, FHD+ təsvir ölçüsü, 120Hz yeniləmə tezliyi, 2000 nit parlaqlıq təklif edən Super AMOLED ekran panelinə sahibdir. Habelə bu ekran paneli HDR10+ dəstəkləyir və barmaq izi oxuyucusu panelin altında yerləşir. Yuxarı sol küncdəki gümüşü və şaquli kamera dizaynı isə diqqəti cəlb edir.
Telefonun arxa qapağında dörd vint mövcuddur. Belə ki, bu vintləri açmaqla siz smartfonun arxa qapağını açaraq yenisi ilə əvəz edə bilərsiniz. Açıq yaşıl, mavi və narıncı tonlarda örtük variantları mövcuddur. Arxa qapağın sağ alt küncündə dairə şəkilli telefon dayağı mövcuddur ki, buraya müxtəlif aksesuarları əlavə etmək mümkündür. CMF Phone 1 MediaTek-in Dimensity 7300 prosessoru ilə gəlir. 8 GB-a qədər RAM və 128 GB yaddaş təklif edən smartfon 33 Vt sürətli şarjı dəstəkləyən 5000 mAh batareya ilə təchiz edilib. Nothing OS 2.6 ilə işləyən cihaz Android 14 ilə qutudan çıxır. Kamera tərəfində f/1.8 diyaframlı 50 MP əsas kamera və 2MP dərinlik kamerasıı yer alır. Ön tərəfdə 16 MP kamera var. Smartfonun qiymətinə gəlincə isə yeni CMF Phone 1 modeli iyulun 12-dən etibarən 199 dollardan başlayan qiymətlə satışa çıxarılacaq. Habelə, arxa qapaqların qiyməti 35 dollar olacaq və digər aksesuarları 25 dollara əldə etmək mümkün olacaq.
