Avtonom nəqliyyat vasitələri ilə bağlı araşdırmalar davam edərkən, tədqiqatçılar iki trend mövzunu bir araya gətiriblər. Belə ki, Tokio Universitetində avtonom olaraq avtomobil sürə bilən insanabənzər yeni bir robot hazırlanıb. Ümumiyyətlə, sürücüsüz avtomobillər həyatımıza hələ yeni daxil olduğu halda, robotların idarə etdiyi avtomobillərin də hazırlanması gələcəkdən bizə xəbər verir deyə bilərik.
Avtonom avtomobillər yavaş-yavaş şəhərlərdə geniş yayılır. Tam avtonom robotaxi xidmətləri sürətlə müxtəlif şəhərlərdə, xüsusən də ABŞ-da geniş istifadə olunur. Bununla belə, avtonom avtomobillərin arabir piyadaları vurması, nəqliyyatın hərəkətini dayandırması və ya qəzalara uğraması barədə də müxtəlif məlumatlar var. Tokio Universitetinin tədqiqatçıları insanabənzər robot hazırlayıb və onu elektrikli avtomobilin oturacağına yerləşdiriblər. Tədqiqatçılar insanabənzər robotların şüurluluq baxımından təsirli olduğunu iddia edirlər. Tədqiqat qrupundan biri Toyota üçün konsaltinq apararkən hazırlanmış robotu “əzələ-hərəkətli insanabənzər robot” kimi təsvir edib.
Tədqiqatçılar robotu Musashi adlandırırlar. Bu ad əslində Yaponiya tarixinin ən istedadlı qılınc ustalarından biri olan Miyamoto Musashidən gəlir. İnsanabənzər robot Musashi əlləri ilə avtomobili işlək vəziyyətə gətirə, əl əyləcini çəkə və hətta siqnal verə bilir. Qeyd edək ki, yeni robot həmçinin qaz və əyləc pedallarını da məharətlə idarə edə bilir. Tədqiqatçılar robotun işıqforların siqnallarını başa düşdüyünü və hansı vəziyyətlərdə dayanmalı olduğunu öyrəndiyini iddia edirlər. Bununla belə, hələ qət edilməli olan çox uzun bir yol var. Tədqiqatçılar əldə edilən məlumatlardan istifadə edərək gələcəkdə humanoidlərin avtonom idarə etməsi üçün növbəti aparat və proqram təminatı hazırlamaq istəyirlər.
