SpaceX şirkətinin baş direktoru Elon Musk, yeni Starlink peyklərinin orbitdəki yerini dəyişir. Belə ki, şəbəkə gecikməsini azaltmaq üçün peyklərin daha aşağı hündürlüklərdə yerləşdirilməsi planlaşdırılır. Qeyd edək ki, SpaceX-in Yer orbitində 5000-dən çox Starlink peyki var. Elon Musk gələcəkdə bu rəqəmi daha da artırmaq istəyir.
SpaceX Ceo-su bu yaxınlarda şəbəkədə olan gecikməni azaltmaq və peyk internetinin yerüstü genişzolaqlı işləməsini təmin etmək üçün Starlink peyklərinin yeni nəslini daha aşağı hündürlükdə yerləşdirməyi planlaşdırdığını açıqlayıb. Ümumiyyətlə normal internet bağlantısının gecikmə müddəti 20 millisaniyədən az olmalıdır. Bu, əlaqələri funksional olaraq real vaxt rejimində edir. Video söhbət və onlayn oyun kimi tətbiqlər üçün gecikmə ümumi sürətdən daha vacib hesab olunur. Bu göstəricilərdən hər ikisi hazırkı Starlink peykləri ilə zəif işləyir. SpaceX bütün bu problemlərin aradan qaldırılması üçün Starlink peyklərinin orbitdəki yerini dəyişir.
Bu yaxınlarda özünü Diablo IV oynayarkən yayımlayan Musk, SpaceX-in 550 kilometr yerinə 350 kilometr hündürlükdə orbitə çıxacaq növbəti peyk dizaynı ilə gecikmə problemini həll edəcəyini söylədi. SpaceX bu yaxınlarda elan etmişdi ki, internet bağlantısı 28 ms-lik orta gecikməyə nail olub. Lakin Starlink bağlantısı digər internt provayderlərinin təklif etdiyi internet performansından hələ də geridədir. Bir çox istifadəçi hələ də gecikmələrin çox olduğunu düşünür və bu da onların internet xidmətlərindən istifadə etməsini çətinləşdirir. Daha aşağı hündürlüklərdə yeni peyklərin əlavə edilməsinin şirkətin planlaşdırdığı mobil rabitə xidmətinə də kömək edə biləcəyi düşünülür. Yeni addım ilə Starlink gecikmə müddətini 20 ms-dən aşağı endirmək texniki cəhətdən mümkün ola bilər.
