Xiaomi brendinin tezliklə satışa çıxarılacaq ilk şaquli qatlanan smartfonu Mix Flip modelinin real görüntüsü ortaya çıxıb. Beləliklə, qatlana bilən smartfon bazarına daha bir dişli rəqib daxil olmağa hazırlaşır. Xiaomi bu dəfə olduqca iddialı performansa sahib smartfonu ilə bazara daxil olur. Gəlin görək yeni qatlana bilən smartfon hansı xüsusiyyətlərə sahibdir?
Xiaomi Mix Flip modelinin internetdə ortaya çıxan real görüntüsü əvvəlki dizayn sxemini təsdiqləyir. Beləliklə, yeni qatlanan smartfon ikili kamera quruluşu və ikili LED flaş ilə təchiz olunub. Bundan əlavə, smartfon böyük xarici ekran ilə istifadəçilərə təqdim ediləcək. Smartfonun kamerası bir çox Xiaomi smartfonunda olduğu kimi Leica ilə əməkdaşlıq əsasında hazırlanıb. Qeyd edək ki, smartfonda 50 MP təsvir ölçülü əsas kamera və Omnivision OV60A ½, 8 düymlük sensorlu 2x böyütmə ilə telefoto kamera quraşdırılıb.
Snapdragon 8 Gen 3 prosessoru ilə təchiz ediləcək smartfonun 67 Watt sürətli şarj dəstəyi, simsiz enerji doldurma, suya və toza davamlılıq və peyk əlaqəsi xüsusiyyətlərinə sahib olacağı gözlənilir. Analitiklər iddia edir ki, Xiaomi yeni Mix Flip modeli ilə birlikdə bizlərə Mix Fold 4 modelini də təqdim edə bilər. Xiaomi-nin dördüncü nəsil qatlanan smartfonu olacaq Mix Fold 4, Mix Flip kimi Snapdragon 8 Gen 3 çipsetindən güc alacaq. Kamera tərəfində isə əlavə olaraq 12MP ultra geniş və 10MP periskop kameranın smartfona quraşdırılacağı gözlənilir. Hər iki cihazın bazardakı ən incə qatlana bilən smartfonlar arasında olacağı iddia edilir.
