Əvvəllər yalnız Yerdən kənarda Veneradan görülən halo effekti, göy qurşağı bənzəri bənzər rəngli və konsentrik işıq halqalarının düzülüşünü ifadə edir. Maraqlısı budur ki, indi Veneradan əlavə olaraq Yerdən 637 işıq ili uzaqlıqda olan planetdə göy qurşağı göründü. Ekzoplanetdə ilk dəfə olaraq göy qurşağına bənzər “halo effekti”nin əlamətləri aşkar edilib.
Halo effekti, planetin ətrafında fırlanan ulduzdan gələn işığın tamamilə homojen bir maddədən ibarət buludlar tərəfindən əks olunması zamanı baş verir. Tədqiqatçılar bu effektin Yerdən 637 işıq ili uzaqlıqdakı qaz nəhəngi WASP-76b-dən baş verdiyinə dair siqnal aldılar. 2013-cü ildə kəşf edilən bu ekzoplanet Yupiterdən təxminən 1,8 dəfə böyükdür, lakin Yupiterin kütləsinin 92 faizini təşkil edir. Daim ulduzu ilə üzbəüz olan planetin gündüz tərəfində 2400 dərəcəyə çatan temperatur müşahidə olunur. Dəmir bu temperaturda buxarlandıqdan sonra güclü və sürətli küləklər vasitəsilə planetin daha soyuq gecə tərəfinə daşınır və burada qatılaşaraq damcılara çevrilir nəticədə isə dəmir yağdırır.
Avropa Kosmik Agentliyinin Ekzoplanet Peyki tərəfindən edilən bu müşahidə təsdiqlənərsə, bu fenomen ilk dəfə Günəş sistemindən kənarda aşkar ediləcək. Qeyd edək ki, missiyasına 2019-cu ildə başlayan CHEOPS WASP-76b-ni üç il ərzində 23 dəfə müşahidə edib. Astronomy & Astrophysics elmi jurnalında dərc olunan araşdırmanın müəlliflərindən biri Olivier Demangeon bildirib ki, “Günəş sistemimizdən kənarda heç bir halo effekti müşahidə edilməməsinin səbəbi bu fenomenin çox xüsusi şərtlər tələb etməsidir. Hər şeydən əvvəl, atmosfer hissəcikləri demək olar ki, mükəmməl sferik, tamamilə homojen və uzun müddət ərzində müşahidə oluna biləcək qədər sabit olmalıdır. Bu damcılar planetin ana ulduzu tərəfindən birbaşa işıqlandırılmalı və müşahidəçi (bu halda CHEOPS) düzgün mövqedə olmalıdır”.
