Bu dəfə insanlar nadir hallarda rastlanan günəş tutulmasını izləmək üçün milyardlarla dollar xərcləyib. Belə ki, ABŞ-da tam günəş tutulmasını müşahidə etmək istəyən insanlar təkcə ABŞ iqtisadiyyatına 1,6 milyard dollar töhfə veriblər. Qeyd edək ki, 8 Aprel tarixində Meksika, ABŞ və Kanadanın bəzi ərazilərində günəş tutulması həyata keçib. Milyonlarla insan tam günəş tutulmasına şahid olmaq üçün Texas və Nyu-York kimi şəhərlərə axışmağa başlayıb.
Məhz Günəş tutulmasını “yerindən” izləmək istəyənlər otellər, eynək istehsalçıları, paraşüt şirkətləri başda olmaqla bir çox şirkətlərə ümumilikdə milyonlarla dollar fayda verib. Maraqlısı budur ki, nadir hallarda rast gəlinən təbiət hadisəsi təkcə ABŞ iqtisadiyyatına 1.6 milyard dollar fayda verib. Bildiyimiz kimi, Günəş tutulmaları Ayın Yerlə Günəş arasına girməsi zamanı baş verən təbii hadisələrdir. Bu hadisə tək başına çox nadir hallarda müşahidə edilən bir hadisə olsa da, tam günəş tutulması daha az rast gəlindiyi üçün diqqət cəlb edir.
NASA-nın “nadir və möhtəşəm” kimi xarakterizə etdiyi bu təbiət hadisəsi keçmişdə fəlakətlərlə əlaqələndirilirdisə, bu gün iqtisadi aktivlik kimi ifadə olunur. NASA-nın məlumatına görə, builki tutulma təxminən üç-dörd dəqiqə davam edib. Şimali Amerikadan görünən növbəti tutulma isə 2044 və ya 2045-ci illərdə görünəcək. Buna görə də ABŞ-da 3,7 milyon insan tutulmanı görmək üçün səyahət edib. İnsanlar günəş tutulmasının baş verəcəyi bölgələrdə gecələməyə otel və ya ev tapmaqda çətinlik çəkib. Habelə, digər günlərdə 80 dollar olan otaqların qiymətləri 949 dollara qalxıb. Günəş eynəyi istehsalçıları da hər biri 1,5 ilə 2 dollar arasında dəyişən qiymətlərlə 70 milyon eynək satdıqlarını ifadə ediblər.
