Fransa Atom Enerjisi və Alternativ Enerji Agentliyi tərəfindən (CEA) dünyanın ən güclü maqnit rezonans görüntüləmə (MRT) cihazı ilə insan beyninin ən aydın görüntüsü dərc edib. CEA-nın verdiyi yazılı açıqlamada, “Iseult” adlı MRT cihazı ilə çəkilmiş ən aydın beyin görüntüsünün 20 ildən çox davam edən araşdırma nəticəsində əldə edildiyi bildirilib. Yeni əldə edilmiş görüntü həqiqətən də, insan beyninin mürəkkəbliyini bir daha sübut edir.
Araşdırmalar çərçivəsində MRT cihazının son bir neçə ayda təxminən 20 sağlam könüllü üzərində sınaqdan keçirildiyi və ən aydın beyin görüntüsünün təxminən 4 dəqiqə ərzində əldə edildiyi ifadə edilib. Həmçinin açıqlamada qeyd olunur ki, 11.7 Tesla maqnit gücünə malik Iseult MRT aparatı ilə qısa müddətdə çəkilən görüntüləri, xəstəxanalarda çox istifadə edilən cihazlarla əldə etmək saatlar çəkə bilər. Iseult Layihəsinin rəhbəri və CEA Araşdırma Direktoru Nicolas Boulant, daha yüksək keyfiyyətli məlumat əldə etmək üçün araşdırmaların daha bir neçə il davam edəcəyini qeyd edib.
Boulant onu da bildirib ki, onların məqsədləri 2026-2030-cu ilə qədər psixiatriya sahəsində şizofreniya və bipolyar pozğunluq, həmçinin neyrodegenerativ xəstəliklər kimi bir çox xəstəliyi araşdırmaqdır. Iseult MRT cihazı ilə əldə edilən geniş anatomik məlumatların Alzheimer və Parkinson kimi xəstəliklərin diaqnozuna kömək edəcəyi də gözlənilir.
