Bildiyimiz kimi, Microsoft şirkətinin sonuncu əməliyyat sistemi olan Windows 11 təqdim etdiyi bütün yeniliklərə rəğmən heç də uğurlu alınmamışdı. Belə ki, təqdim edilməsindən bir neçə il ötməsinə baxmayaraq, Windows 11 populyarlığını hər ötən gün itirməyə davam edir. Statcounter mənbəsinin 2024-cü ilin mart ayı üçün təqdim etdiyi hesabat ilə tərtibatçılara və istifadəçilərə brauzerlər, əməliyyat sistemləri, axtarış mühərrikləri kimi məhsullar haqqında ən son məlumatları təqdim edib. Beləliklə, Statcounter-ə görə, Windows 11 getdikcə daha az istifadə olunmağa davam edir.
Statcounter bildirib ki, mart ayında Windows 11 sisteminin bazar payı sadəcə 26,72% təşkil edib ki, bu da əvvəlki ayla müqayisədə 1,46% daha azdır. Bununla yanaşı, Windows 10 fevral ayı ilə müqayisədə təxminən 2% populyarlıq qazanıb. Qeyd edək ki, şirkət bu yaxınlarda Windows 10 sisteminə sahib olan bir çox cihaza “təkmilləşdirmə dəvəti” göndərməyə başlayıb. Ümumiyyətlə, Microsoft son dövrlərdə Windows 11 sisteminin populyarlığını artırması üçün müxtəlif addımlar atıb. Belə ki, şirkət süni intellekt tərəfində istifadəçilərə bir çox yenilik təqdim edib. Lakin bu addımların heç biri Windows 11-in bazar payını artırmağa kömək etməyib.
Hazırda Windows 10 sistemi 69%-dən çox bazar payına sahibdir. Xatırladaq ki, bu əməliyyat sisteminin ömrü 2025-ci ilin oktyabrında başa çatacaq, buna görə də Microsoft-un yaxın gələcəkdə Windows 11-in daha sərfəli cihazlara təqdim edilməsini sürətləndirəcəyi gözlənilir. Maraqlısı budur ki, artıq yenilənmə dəstəyi olmamasına rəğmən Windows 7, 8.1 və 8 hələ də nisbətən böyük bazar paylarına malikdir. Windows 7-nin bazar payı 3,04%, Windows 8.1-in bazar payı 0,44%, Windows 8-in isə 0,29% bazar payı mövcuddur.
