Çinli Xiaomi brendinin ilk elektromobil seriyası olan SU7 indi yeni versiyaları və qiymətləri ilə qarşımızdadır. Ümumiyyətlə, Xiaomi brendi qiymət tərəfində həqiqətən də heç bir açıqlama verməsə də, onun tək sirri qiymət deyilmiş. Belə ki, Xiaomi SU7 modelinin indi daha 2 versiyası məlum olub. Beləliklə elektromobil bazara 4 fərqli versiyada çıxacaq. Onlardan biri isə xüsusiyyətlərinə görə Tesla Model S Plaid ilə rəqabət aparır.
SU7-nin texniki xüsusiyyətlərini sızdıran Çinli Weibo istifadəçisinə görə, ilk versiyada elektromobil 229 at gücü və 400 nm fırlanma anı hasil edən tək elektrik mühərrikinə sahib olacaq. Habelə, bu versiyada elektromobil 100 km/saat sürətinə 5.28 saniyəyə sürətlənəcək. Bu, həm də 500V arxitekturasında qurulmuş yeganə versiyadır 15 dəqiqəlik şarj ilə 330 km məsafə təmin edən elektromobilin maksimal sürəti isə 210 km/saat ilə məhdudlaşır və 73,6 kWh LFP batareyası sayəsində 668 km mənzilə sahibdir. Giriş səviyyəli modelin məlumat-əyləncə sistemi tək Nvidia Orin çipi ilə təchiz edilib, avtomobil 19 düymlük təkər diskləri və 15 dinamikli audiosistemlə təchiz edilib. Onu da qeyd edək ki, bu versiyada olan SU7 28 min avro başlanğıc qiymətinə sahib olacaq.
Seriyanın növbəti modeli SU7 Pro-dur. SU7 Pro, 101 kVt/saat tutumlu Kirin batareyasına sahib olan ilk modeldir və nəticədə 900 km mənzil vəd edir. Bu versiyada da avtomobil tək elektrik mühərrikinə sahib olub. Belə ki, elektrik mühərriki bu versiyada 374 at gücü və 438 nm fırlanma anı hasil edir. 100 km/saat sürətinə 4.68 saniyəyə çatan elektromobil daha çevik hala gəlir. Kirin batareyası 871V arxitektura ilə işləyir – bu o deməkdir ki, 15 dəqiqəlik DC şarj 570 km məsafə təmin edir. Brembo əyləcləri bu versiyada standartdır və əyləc məsafəsini 100 km/saatdan 33,3 m-ə qədər azaldır. Bu versiya isə 33500 avro qiymət etiketinə sahib olub.
Növbəti versiya SU7 Max olub. Biz bu versiyanı əvvəllər görmüşük – iki mühərrikli, 673 at gücünə malik güc aqreqatı və 838 Nm fırlanma anı onu elektrik canavarına çevirir. 0-dan 100 km/saata 2,78 saniyəyə sürətlənən elektromobil 800 km məsafə qət etməyi vəd edir. Maksimal sürəti 265 km/saatla məhdudlaşan bu versiyada isə 15 dəqiqəlik şark 510 km məsafə vəd edir. Bu versiya daha çox xüsusiyyətlərə sahibdir və 38670 avroya təklif olunur.
Xiaomi SU7 seriyasının versiyaları bununla da tükənmir. Son olaraq SU7 FE adlı 871V arxitekturasına malik daha performanslı versiya mövcuddur. FE versiyası ümumi gücü 1074 at gücü və ya 770 kVt olan elektrik mühərrikləri ilə təchiz edilmişdir. Onun ikili və ya üç mühərrikli olması ilə bağlı hələlik heç bir təfərrüat yoxdur. Lakin elektrik mühərrikləri 1276 nm fırlanma anı hasil edir və o, 1.98 saniyəyə 0-dan 100 km/saat sürətlənməyə imkan verir. Tesla Model S Plaid rəqibi kağız üzərində olduqca iddialı görünür. Ən sürətli SU7 FE 21 düymlük disklərə və 300 km/saat maksimal sürətə malikdir. Bu versiya isə 339.000 RMB və ya 43.800 avrodan başlayan qiymətlərlə təklif olunacaq. Bu isə Model S Plaid-dən 2 dəfə daha ucuzdur.
