Microsoft bu dəfə yeni təqdim etdiyi DirectSR API-si ilə DLSS, FSR və XeSS funksiyalarının performansını da artıracaq. Qeyd edək ki, texnologiya nəhəngi Windows 11 24H2 yeniləməsi ilə yerli “Super Resolution” xüsusiyyətini təqdim edəcək. Həmçinin şirkət DirectSR adlı xüsusiyyət üçün Nvidia, AMD və Intel ilə işlədiyini açıqlayıb. Ümumiyyətlə texnologiya nəhənginin yeni xüsusiyyəti tərtibatçılara Nvidia, AMD və Intel-in super həlledici süni intellekt xüsusiyyətlərini öz oyunlarına inteqrasiya etmək üçün mükəmməl bir yol təqdim edəcək. Məhz DirectSR-in əsas məqsədi də problemsiz və asan şəkildə inteqrasiyanı təmin etməkdir.
Beləliklə deyə bilərik ki, Microsoft, Super Resolution (SR) yeni nəsil oyunlara qüsursuz şəkildə inteqrasiya etmək üçün GPU aparat təchizatçıları ilə birgə hazırlanmış yeni DirectSR API-ni elan etdi. Texnologiya nəhənginin dərc etdiyi bloq yazısında DirectSR API oyunlar və super rezolyusiya texnologiyaları arasında “əksik halqa” kimi təsvir edilir. O cümlədən şirkət bildirir ki, DirectSR cihazlar arasında daha hamar, daha səmərəli təcrübə təmin edəcək. Microsoft həmçinin DirectSR-nin Nvidia DLSS Super Resolution, AMD FidelityFX Super Resolution və Intel XeSS-ni dəstəklədiyini vurğulayır.
Ümumiyyətlə Microsoft bildirir ki, DirectSR tezliklə Agility SDK-da ictimai önizləmə kimi əlçatan olacaq və tərtibatçılara sınaqdan keçirməyə və rəy bildirməyə imkan verəcək. Bununla belə, texnologiya nəhəngi DirectSR-in oyunlarda necə istifadə ediləcəyi ilə bağlı heç bir təfərrüat paylaşmayıb. Şirkət, GDC (Game Developers Conference) çərçivəsində keçiriləcək DirectX State of the Union tədbirində daha ətraflı məlumat paylaşacağını bildirir. Qeyd edək ki, bu tədbir martın 21-də baş tutacaq və tədbirdə Nvidia, AMD şirkətlərindən də nümayəndələr iştirak edəcək.
