Daim öz Twitter(X) profilindən texnologiya nəhənglərini tənqid etməyi sevən Elon Musk bu dəfə Microsoft şirkətini hədəf alıb. Belə ki, məşhur milyarder bildirib ki, o, özünə yeni noutbuk alsa da Microsoft hesabı açmaq istəmədiyi üçün ona daxil ola bilməyib. Ümumiyyətlə Elon ötən günlərdə Google şirkətinin süni intellekt çatbotu olan Gemini-ni hədəf almışdı.
Elon X platformasındakı milyonlarla izləyicisinə bildirib ki, yeni aldığı noutbukuna daxil ola bilmir. Bunun səbəbi isə Microsoft hesabı olmamasıdır. Həmçinin Elon şirkətin X hesabını işarələyərək bildirib ki, bu heç də xoş deyil. Tesla-nın baş direktoru bazar günü Microsoft-un qabaqcıl məhsulu Windows-da Microsoft istifadəçi hesabı yaradılmayınca laptopundan istifadə etməyə icazə verməməsindən məyus olduğunu bildirib və profilində bu yazını paylaşıb: “Mən yeni noutbuk aldım və mən Microsoft hesabı yaratmayana qədər Microsoft ondan istifadə etməyimə icazə vermir! Bu bərbad vəziyyətdir”.
Maraqlısı isə budur ki, bir çox insan Elon-u dəstəkləyib və onun bu vəziyyətdə haqlı olduğunu bildiriblər. Ümumiyyətlə Microsoft-un problemsiz bir istifadəçi təcrübəsi və təkmilləşdirilmiş təhlükəsizlik təmin etmək məqsədi ilə istifadəçilərdən hesab açmasını tələb etməsi də diqqət çəkib. Bəzi hesabatlar göstərir ki, Microsoft yalnız hesab açdığınız zaman fərdiləşdirilmiş parametrləri təmin edə, cihazlar arasında məlumatları sinxronlaşdıra bilər. Qeyd edək ki, Elon-un paylaşımı həm də insanlar arasında mübahisə meydana gəlməsinə də səbəb olub.
