Avropa Komissiyasının ötən il dərc etdiyi hesabata görə, dünyanın 2500 ən böyük şirkəti 2023-cü ilin sonuna qədər tədqiqat və inkişafa (R&D) 1,25 trilyon avro xərcləyib. Belə ki, Çin Avropanı geridə qoyaraq ABŞ-dan sonra ikinci sırada qərarlaşmağı bacarıb. 2012-ci ildə Çinli şirkətlər elmi-tədqiqat işlərində sadəcə 4.3% paya sahib olsa da indi daha çox pul xərcləyir. Habelə Çinin qlobal bazarda elmi-tədqiqat işlərinə ayırdığı vəsaəitlərin məbləği 2023-cü ildə 17.8% bazar payına bərabər olub.
Qeyd edək ki, Çinli şirkətlər Avropalı texnologiya nəhənglərini elmi-tədqiqat işlərində sadəcə çox cüzi bir fərqlə ötüb. Belə ki, Avropa 2023-cü ilin sonunda elmi-tədqiqat işlərinə ayırdığı vəsaitlərdə dünyada 17.5% paya sahib olmuşdu. Maraqlısı budur ki, Çinli şirkətlər elmi-tədqiqat işlərinə Avropadan daha çox pul xərcləsədə 42.1% paya sahib olan ABŞ-dan xeyli geridə qalmışdı. Çinli şirkətlər arasında Huawei brendi elmi-tədqiqat işlərinə daha çox pul xərcləyir. Şirkət ötən ilin sonunda elmi-tədqiqat işlərinə 20.9 milyard avro xərcləyib. Habelə şirkət büdcəsini 2022-ci ilə nisbətən 11% artırmağı bacarıb.
Ümumiyyətlə Çinli şirkətlər ABŞ sanksiyalarına rəğmən son illərdə texnoloji məqsədlər üçün gəlirlərinin 10-20%-ni ayırır. Məhz bunun nəticəsidir ki, bu gün Huawei brendi ABŞ sanksiyalarına rəğmən özünəməxsus əməliyyat sistemi və çipset hazırlayaraq ayaqda durur. Çində elmi-tədqiqat işlərinə ən çox vəsait ayıranlar arasında Tencent və Alibaba kimi məşhur şirkətlər də yer alır. Avtomobil istehsalçıları SAIC və BYD ilə yanaşı, Çin iqtisadiyyatının tikinti və informasiya infrastrukturuna cavabdeh olan bir sıra şirkətlər də Çində elmi-tədqiqat işlərinə ən çox sərmayə qoyanlar sırasındadır.
