Çinlilər bu dəfə elektromobil sahəsindəki uğurlarını rəsmiləşdirdi. Belə ki, çinli BYD brendi qlobal 2023-cü ilin son rübü üzrə qlobal elektromobil satışlarında Tesla şirkətini ötərək lider olmağı bacarıb. Beləliklə BYD brendi artıq rəsmi olaraq dünyada ən çox elektromobil satan avtomobil brendi olaraq tarixə adını yazdırıb. Ümumiyyətlə son illərdə çinli avtomobil nəhənglərinin daha ucuz və daha müasir funksiyalara sahib elektromobillər ilə bazara çıxması Tesla kimi nəhəngi ötməsinə imkan yaradıb. Bildiyimiz kimi, elektromobil dedikdə ilk olaraq ağla Elon Musk və onun Tesla brendi gəlirdi. Buna səbəb isə Tesla brendinin dünyada müxtəlif regionlarda uzun müddət elektromobil satışı üzrə lider olması idi.
İndi Tesla çinli rəqibi BYD ilə mübarizədə məğlub olub və BYD brendi elektromobil satışlarında lider mövqeyini əldə edib. Qeyd edək ki, ötən ilin son 3 ayında Tesla sadəcə 484 min 507 ədəd elektromobil satıb. BYD şirkətinin hesabatına görə isə bu göstərici 526 min 409 ədəd olub. Hətta BYD bildirib ki, dekabr ayında satışlar 70%-ə qədər artıb. Tesla çinli elektromobil nəhəngindən geri qalsa da, bu illik 1.8 milyon ədəd elektromobil hədəfinə çatmağı bacarmışdı. Habelə şirkətin səhmləri də 102% dəyərlənib.
Hazırda çində elektromobil şirkətlərinin sayı artmaqda davam edir. Hətta ötən günlərdə Xiaomi brendi də yeni flaqman elektromobili ilə bu bazara rəsmi olaraq daxil olduğunu elan etmişdi. Ümumiyyətlə bu gün elektromobil tərəfində əsas diqqət məhz çinin üzərindədir. Buna səbəb də təbii ki, elektromobillərin daha ucuz və daha futuristik xüsusiyyətlər ilə təqdim edilməsidir. Hazırda avropalı avtomobil nəhəngləri elektromobil satışlarında dəfələrlə geridədir.
