Qualcomm şirkəti ötən aylarda yeni Snapdragon 8 Gen 3 və X Elite prosessorlarını təqdim etmişdi. Belə ki, yeni nəsil flaqman çipset və prosessorlar yüksək performansı ilə diqqətləri cəlb etməyi bacarmışdı. Təqdimat zamanı Qualcomm yeni Snapdragon X Elite çipsetinin 4nm istehsal prosesindən keçən 12 yüksək performanslı Oryon nüvəsi ilə təchiz edildiyini bildirmişdi. O cümlədən Qualcomm iddia etmişdi ki, bu prosessor Apple şirkətinin M2 prosessorundan 50% daha sürətlidir. İndi isə Qualcomm şirkətinin yeni hesabatına əsasən ortaya çıxıb ki, Snapdragon X Elite prosessoru Apple şirkətinin M3 prosessorundan 21% daha sürətlidir.
Qualcomm şirkətinin ofisinə baş çəkən Digital Trends jurnalistləri yeni prosessorun performans nəticələrini əldə ediblər. Belə ki, flaqman Snapdragon X Elite 15300 xal ilə rəqibi M3 prosessorunun 12154 xal nəticəsini üstələyə bilib. Ümumiyyətlə performans nəticələri X Elite çipsetinind aha üstün performansa sahib olduğunu ortaya çıxarsa da, Qualcomm bildirib ki, təcrübə eyni olmayacaq. Buna səbəb isə bir prosessorun Windows, digərinin isə macOS sistemi ilə işləməsidir.
Hazırda bir çox noutbuk istehsalçısı öz modellərində Snapdrgon X Elite istifadə etməyə hazırlaşır. Qualcomm prossorunu təqdim edərkən onun Intel 13-cü nəsil CPU-lar səviyyəsində olduğunu da bildirmişdi. Habelə prosessorda qrafik tərəfdə, DirectX 12 API dəstəyi ilə 4,6 TFLOP dəyərində inteqrasiya olunmuş Adreno GPU işlədilib. Habelə H.264, HEVC və AV1 faylları üçün 4K60 10-bit kodlaşdırma və deşifrəni dəstəkləyən Adreno video emal bölməsi mövcuddur. Snapdragon X Elite saniyədə 30 token yaradaraq cihazda 13 milyarddan çox parametri emal edə bilir. Çipset 136 GB/s-ə qədər yaddaş ötürmə qabiliyyəti, 42 MB ümumi keş, həmçinin PCIe Gen4 və ya UFS 4.0 yaddaşa malik LPDDR5x RAM-ı dəstəkləyir.
