Oyun sənayesi və oyun həvəskarları üçün bir dövrün sonu gəlib. Belə ki, 1995-ci ildən 2019-cu ilə qədər davamlı olaraq keçirilən məşhur Elektron Əyləncə Sərgisi E3 artıq ləğv edildi. 20 ildən çox davan edən sərgi bütün oyun sənayesinin diqqət mərkəzində olmuşdu. Lakin son uğursuz cəhdlərdən sonra sərginin ləğv edilməsi qaçınılmaz olub. Qeyd edək ki, sərgi covid-19 pandemiyası səbəbindən ləğv edilmişdi. 2 il sonra 2021-ci ildə keçirilən E3 sərgisi isə gözləntiləri rəqəmsal keçirildiyi üçün qarşılamadı.
Bu il keçiriləcək Elektron Əyləncə sərgisi isə iştirakçıların az marağı və iştirakçı sayının hədsiz azlığı səbəbindən həmişəlik olaraq ləğv edildi. Lakin yenə də Əyləncə Proqramı Assosiasiyası (ESA) bir neçə ay əvvələ qədər E3 2024 və E3 2025 planlarından əl çəkmirdi. İndi isə ESA X platformasında elan edib ki, “ABŞ və qlobal video oyun sənayesi üçün mərkəzi vitrin rolunu oynayan iyirmi ildən çox bir ticarət şousuna ev sahibliyi etdikdən sonra ESA E3-ü sona çatdırmaq qərarına gəldik”. ESA prezidenti Stanley Pierre-Louis The Washington Post qəzetinə verdiyi müsahibədə bildirib ki, “Belə bir məşhur və sevimli sərgini ləğv etmək bizim üçün də çətin oldu. Lakin sərgi ilə vidalaşmaq oyun sənayesinin tərəfdaşları və pərəstişkarları üçün yeni imkanlar açmaq məqsədi ilə alınmış qərardır”.
Pierre-Louisin sözlərinə görə, E3-ün bağlanması video oyun sənayesinin “başqa istiqamətlərdə inkişaf etməsi” deməkdir. Böyük şirkətlər indi öz şoularına ev sahibliyi edə və ya digər tədbirlərlə tərəfdaş ola bilərlər. E3-ü əvəz etmək cəhdləri davam edir. Hətta bir neçə gün əvvəl keçirilən Game Awards tədbiri E3 mədəniyyətinin çox hissəsini mənimsədi. Görünən odur ki, indi daha fərqli formalarda oyun sərgiləri və festivalları keçiriləcək.
