Microsoft şirkətinin yeni Windows 12 əməliyyat sistemi üzərində çalışdığı artıq hərkəsə məlumdur. Hətta ötən günlərdə tayvanın ən böyük maliyyə qəzeti olan Commercial Times, yayımladığı hesabatda Microsoft-un Windows 12 əməliyyat sisteminin gələn ilin iyun ayında buraxılacağını bildirmişdi. İndi isə məlum olub ki, Windows 12 əməliyyat sistemi heç də gözlədiyimiz kimi, bütün cihazlar üçün əlçatan olmayacaq. Belə ki, Windows 12 əməliyyat sistemindəki süni intellekt xüsusiyyətlərini işə salmaq üçün ən yeni flaqman prosessorlara ehtiyac yaranacaq. Daha doğrusu bu sistemdəki süni intellekt xüsusiyyətləri NPU yəni neyran mühərrik sistemi olan prosessora ehtiyac duyacaq.
Qeyd edək ki, Windows 11 sisteminin növbəti əsas yenilənməsi məhz Hudson Valley adlanır. Habelə bu yenilənmə bizlərə Windows 12 kimi təqdim ediləcək. Yenilənmə bərabərində daha fərqli dizayn, daha çox süni intellekt funksiyası da gətirəcək. Ümumiyyətlə son dövrlərdə bütün texnologiya sahəsində süni intellektdən istifadə olunur. OpenAI şirkətinin ən böyük maliyyə dəstəkçisi olan Microsoft şirkətinin də yeni əməliyyat sistemində süni intellekt alətlərinə böyük önəm verməsi heç də təəccüblü deyil. Lakin Windows 12 əməliyyat sistemindən istifadə etmək üçün yeni prosessorlara ehtiyac yaranması heç də istifadəçilərin ürəyincə olmayacaq.
Hazırda bazarda olan bir çox prosesor neyron mühərrik sisteminə yəni NPU-ya sahib deyil. Belə ki, süni intellekt xüsusiyyətləri üçün önəmli olan bu sistem yalnız ən son təqdim edilən flaqman prosessorlarda yer alır. Bu isə o deməkdir ki, Windows 12 də Windows 11 kimi istifadəçilərin diqqətini çəkməyəcək. Hətta istifadəçilər istəsə belə yeni prosessorlara sahib olmadan əməliyyat sisteminin bütün süni intellekt xüsusiyyətlərindən istifadə edə bilməyəcək.
