İllərdir PlayStation, Xbox və Nintendo kimi cihazlar aralarında mübarizə aparır. Lakin bundan əlavə bu adı çəkilən oyun konsollar həm də, kompüterlər ilə də rəqabətdədir. Hətta bu cihazların hərbiri özünəməxsus həvəskara malik olub. İndi isə Sony şirkətinin baş meneceri və vitse-prezidenti Hideaki Nishino Playstation 5 ilə bağlı iddialı açıqlamalar edib. Belə ki, Hideaki Nishino son müsahibəsində PlayStation 5 oyun konsolunun bir çox aspektlərdə fərdi kompüterlərdən daha üstün olmasının səbəblərini sadalayıb.
Şirkətin vitse-prezidenti Nikkei Asia mənbəsinə verdiyi müsahibədə PlayStation 5 konsolunun müasir oyunlar üçün daha sadə quraşdırma və optimizasiya təklif etdiyini vurğulayıb. Onun sözlərinə görə bu iki cəhət oyun kompüterinin qurulmasının texniki detallarına daxil olmaq istəməyən istifadəçilər üçün üstünlük təşkil edir. Ümumiyyətlə PlayStation 5 ilə eyni performansa malik olacaq kompüter qurmaq çox baha başa gəlir. Bunun üçün ən son qrafik kartlardan və prosessorlardan birini əldə etmək lazım gəlir ki, günümüzdə həqiqətən də bütün bu detallar çox baha qiymətə satılır.
Hideaki onu da bildirib ki, fərdi kompüterlər oyunlarda PlayStation 5 kimi sabit performans verə bilmir. Nishino, həmçinin oyun sənayesinin mövcud vəziyyətini şərh edərək, oyunların SSD sayəsində sürətli yükləmə də daxil olmaqla PlayStation 5-in xüsusiyyətlərindən daha çox faydalanmağa başladığına diqqət çəkib. Hazırda Sony şirkətinin ən son təqdim etdiyi PlayStation 5 Slim konsolu 1TByaddaş həcmi ilə 499$ qiymət etiketinə sahibdir.
