İşlərimizin görülməsində əvəzsisz rola malik kompüterlər yavaşladıqda hər birimiz narahat oluruq. Sistemin yavaş işləməsi bir çox səbəbdən qaynaqlana bilər. Bəlkə kompüterinizin texniki parametrləri çox zəifdir, ya həddindən artıq çox yüklənib və ya ümumiyyətlə tamam fərqli bir problem var. Lakin problemin sərt diskdən (HDD) qaynaqlana biləcəyini də unutmamaq lazımdır. Sərt disk kompüterimin yavaş işləməsinə nə təsir edəcək desəniz təbii ki, ilk və ən böyük əlverişsiz cəhəti oxuma-yazma sürətinin aşağı olmasıdır. Bənzər dezavantajları ilə birlikdə HDD-lər bu gün bir çox müasir kompüterdə yerini SSD ilə əvəzləyib. Microsoft isə SSD ilə bağlı maraqlı bir standart qəbul etmək istəyir. Belə ki, şirkət bütün OEM lisenziyasına sahib istehsalçıların kompüterlərində SSD quraşdırılmasını tələb etməyi planlaşdırır.
OEM - (Original Equipment Manufacturer / Orijinal Avadanlıq istehsalçısı)
Microsoft şirkətinin bu istəyi istehsalçıları HDD quraşdırmamağa vadar edəcək?
Microsft şirkəti əslində 2022-ci ildə bu planı həyata keçirməyə çalışırdı. Lakin Trendfocus şirkətinin vitse-prezidenti John Chen tərəfindən verilən məlumata görə istehsalçıların etirazı Microsoft-un bu tələbini 2023-cü ilə qədər təxirə salması ilə nəticələnib. Dell, Lenovo, HP, Acer kimi Microsoft şirkətinin rəsmi əməkdaşlıq etdiyi istehsalçılar mövzu ilə bağlı rəsmi açıqlama verməyiblər.
Aydın məsələdir ki, SSD istifadəsi kompüterlərin qiymətini xeyli yüksəldə bildiyindən istehsalçıları belə bir məcburiyyət çətin vəziyyətə salacaq. Amma nəticə etibarilə alınmış qərar HDD istifadəsini tamamilə dayandırmayacaq. Kompüterlərin həm SSD, həm HDD ilə təchiz edilməsinin mümkün olacağı gözlənilir. Yəni 128GB kiçik həcmli bir SSD quraşdıraraq istehsalçılar Microsoft şirkətinin istəyini yerinə yetirmiş hesab ediləcəklər. Böyük bir ehtimalla əsas məsələ Windows 11 əməliyyat sisteminin SSD üzərinə quraşdırılmasından ibarətdir. Çünki, Microsoft həm əməliyyat sisteminin nə qədər sürətli işlədiyini vizual olaraq göstərmiş olacaq, həm də yeni gəlmiş Android tətbiqlərinin səlis işləməsini təmin edəcək.
HDD-lər isə dəyər itirdikcə daha böyük yaddaş həcmi ilə yenilənərək təzədən qarşımıza çıxır. Məsələn, Seagate tərəfindən qarşıdakı illərdə 100TB, 50TB, 30TB sərt disklər istehsal edilməsi nəzərdə tutulub. Əslinə qalsa videolar, oynadığımız oyunlar və.s o qədər yüksək yaddaş yeri tələb edir ki, bəzilərimizə 1TB yaddaş belə az kimi gəlir.
