Beləliklə ABŞ və Çin arasında indi yeni mübarizə, batareya mübarizəsi başlayır. Bildiyimiz kimi, Çin qrafit ixracına məhdudiyyətlər tətbiq edəcəyini açıqlamışdı. Yeni qanun isə 1 dekabrdan etibarən qüvvəyə minib. Beləliklə yerli istehsalçılar qrafiti xaricə göndərmək üçün indi hökumətdən icazə tələb etməlidir. Digər tərəfdə isə ABŞ Çini elektromobil batareyası tədarükü zəncirindən çıxarmağa hazırlaşır. Belə ki, ABŞ Xəzinədarlıq Departamenti cümə günü elan etdi ki, gələn aydan etibarən ABŞ-da Çin istehsalı olan batareyalardan istifadə edərək istehsal olunan bütün elektromobillər dövlətin maliyyə dəstəyindən məhrum olacaq.
Qeyd edək ki, yeni qərar ABŞ prezidenti Co Baydenin “iqlim qanunvericiliyi” – İnflyasiyanın Azaldılması Aktı (IRA) çərçivəsində ödəniyən subsidiyalara aiddir. Yeni qaydalara görə, Çin hökumətinə bağlı avtomobil istehsalçıları tərəfindən istehsal edilən və ya Çində yerləşən operatorla lisenziya müqaviləsi əsasında istehsal edilən elektrik avtomobillərinə subsidiyalar verilməyəcək. Prezidentin təmiz enerji innovasiyası və tətbiqi üzrə baş müşaviri Con Podesta, bildirib ki, “Bu direktivlər və onların təmin edəcəyi aydınlıq ilə biz ABŞ elektromobillərinin gələcəyinin Amerikada olmasını təmin edirik”. Podesta onu da qeyd edib ki, hazırda çin əsas texnologiya zəncirində üstünlük təşkil etməyə davam edir.
Habelə yeni qaydalara əsasən ABŞ-da elektromobillərə IRA çərçivəsində tətbiq edilən vergi endirimi əhəmiyyətli dərəcədə azalacaq. O cümlədən yeni vəziyyət 2025-ci ildən başlayaraq elektrikli avtomobillərdə istifadə olunan kritik minerallara da təsir edəcək. Ümumiyyətlə bu mübarizə çərçivəsində ABŞ həm öz ərazisində, həm də avropada çinli elektromobil istehsalçılarına qarşı məhdudiyyətlər yaradacaq.
