Nəhayət Xiaomi brendi ötən gün Redmi K70 və Redmi K70 Pro modellərindən ibarət olan Redmi K70 seriyasını bizlərə təqdim edib. Ümumiyyəltə Redmi K70 əsasən əlverişli qiymətə təklif olunan flaqman xüsusiyyətlərə sahib cihaz kimi tanınıb. Gəlin uzun müddətdir gözlənilən bu cihazın xüsusiyyətlərinə yaxından nəzər salaq.
Redmi K70 seriyası hansı xüsusiyyətlərə sahibdir?
Ümumiyyətlə Xiaomi ötən gün keçirdiyi tədbirdə Redmi K70 seriyası ilə birlikdə bir çox məhsulunu təqdim edib. Lakin təqdim olunan cihazlar və məhsullar arasında ən çox diqqət çəkən məhz Redmi K70 və Redmi K70 Pro modelləri olub. K seriyasının ən yüksək səviyyəli bu cihazları bir-birindən çox cüzi fərqlənir. Belə ki, dizayn tərəfində Redmi K70 seriyası sələfi K60-dan künc metal çərçivələri və düzbucaqlı kamera adası ilə fərqlənir. Ekran tərəfində isə bizi 4000 nits parlaqlığa malik olan TCL tərəfindən istehsal olunmuş 6.6 düymlük, 2K təsvir ölçülü OLED ekran qarşılayır. O cümlədən bu ekran 120 Hz yeniləmə tezliyi və 3840 Hz PWM yüksək tezlikli qaralma xüsusiyyəti ilə göz rahatlığına əhəmiyyət verir. HDR10 + və Dolby Vision xüsusiyyətlərinə sahib olan ekranın altında isə barmaq izi oxuyucusu yerləşir.
Onu da qeyd edək ki, Qualcomm brendinin yeni flaqman çipseti Snapdraon 8 Gen 3 Redmi K70 Pro modelinə, o cümlədən snapdragon 8 gen 2 isə Redmi K70 modelinə güc verir. Kamera tərəfində isə bizi üçlü arxa kamera dizaynı və OIS dəstəkli 1/1.55 düymlük 50MP əsas kamera sensoru qarşılayır. Habelə Redmi K70 modeli 8 MP ultra geniş bucaqlı kameraya və 2 MP makro kameraya sahib olduğu halda, K70 Pro 2x böyütmə ilə 50 MP telefoto kameraya və 12 MP ultra geniş lensə malikdir.
Hər iki smartfon 120 Vatt sürətli şarj dəstəkləyən 5000 mAs batareya həcminə sahib olub. Xiaomi bildirir ki, smartfonlar sadəcə 12 dəqiqəyə tam şarj ola bilir. Smartfonların digər cəlbedici xüsusiyyətləri arasında isə Wifi-7, NFC, Bluetooth 5.4, 5000 mm2 istilik yayıcı blok mövcuddur. Onu da qeyd edək ki, smartfonlar Android 14 əsaslı Hyper OS əməliyyat sistemi ilə qutudan çıxır. Xiaomi Redmi K70 seriyasını qara, buz mavisi, bambuk ay mavisi, açıq bənövşəyi kimi rəng seçimləri ilə təklif edir.
Yeni smartfonlar hansı qiymətə təklif olunur?
Qiymət mövzusuna gəldikdə isə Redmi K70 modeli 12-256GB yaddaş versiyasında 352 dollar, 16-1TB yaddaş versiyasında isə 479 dollar qiymət etiketinə sahib olub. Daha üstün xüsusiyyətlərə sahib olan Redmi K70 Pro isə 12-256GB yaddaş versiyasında 465 dollar, 24-1TB yaddaş versiyasında isə 621 dollar qiymət etiketi ilə satışa çıxarılıb.
