Hazırda milyonlarla insanın istifadə etdiyi Google Drive yeni problem ilə üzləşib. Belə ki, bəzi Google Drive istifadəçilərinin böyük həcmdə məlumatları itir. Hətta gün keçdikcə problemdən əziyyət çəkənlərin də sayı artmaqda davam edir. Hələlik problemin nə olduğu ilə bağlı məlumat yoxdur, həmçinin bu məlumatların bərpa edilib-edilməyəcəyi də məlum deyil.
Son dövrlərdə Google Drive istifadəçilərinin məlumatları itir və bu barədə sosial şəbəkələrdə də paylaşımlar artır. Maraqlısı budur ki, itən məlumatlar daha əvvəl Drive-a yüklənmiş sənədlər, şəkillər, videolar və digər məlumatlardır. Yəni, son dövrlərdə yüklənən məlumatlarda heçbir problem meydana gəlmir. Ümumiyyətlə insanlar cihazlarındakı yaddaşın dolmaması və məlumatlarını daha uzun müddət saxlaya bilmək üçün bulud yaddaş xidmətlərindən istifadə edir. Bəzən isə bulud xidmətlərində də problemlər meydana gələ bilir. Məhz ən böyük problem də hazırda yaşanan məlumat itkisidir.
Qeyd edək ki, istifadəçilər problem barədə belə yazır:“Bu gün eyni problemlə üzləşdim. Faylları geri ala bilməsəm, bu, mənə böyük problemlər yaradacaq. Son 1-2 ildəki bütün işlərim, bütün biznes işlərim, bütün şəxsi sənədlərim, hər şey bir anda yox oldu. Yüzlərlə faylım yoxa çıxıb. Onları necə geri qaytara biləcəyimdən çox narahatam. Bunlar üzərində işlədiyim və üzərində işləməyə davam etdiyim mühüm layihələr üçün idi”. Hələ bu cür çətinliklərlə üzləşən yüzlərlə istifadəçi də var. Google isə məsələyə hələlik aydınlıq gətirməyib. Bəs sizdə belə problemlər meydana gəlib?
