Ekran panelləri texnologiyasında nəhəng istehsalçıların güclü rəqabəti dayanmadan davam edir. Bir neçə həftə əvvəl ASUS və NVIDIA tərəfindən ərsəyə gətirilmiş 500Hz tezlikli oyunçu monitoru bunun ən gözəl nümunələrindən biri idi. Lakin kompüter monitorları sahəsində rəqabəti fərqli formada inkişaf etdirən səbəblər də vardır. Məsələn, smartfonlarda keyfiyyəti ilə göz oxşayan OLED tipi ekranların kompüterlərdə də istifadəsinə əhəmiyyət verən istehsalçılar vardır. Samsung şirkətinin müxtəlif sektorlarda texnoloji cihazlar, komponentlər hazırladığı məlumdur. Belə ki, Samsung dünyanın ilk 240Hz yüksək tezlikli OLED ekranını yeni bir notbuk üzərində təqdim edib. MSI tərəfindən istehsal olunan MSI Raider GE67 HX modeli Samsung Display istehsalı 240Hz OLED panelə və güclü texniki xüsusiyyətlərə sahibdir.
Samsung kompüter bazarını da yüksək keyfiyyətli ekranlarla təmin edəcək
Samsung şirkəti OLED ekran panellərin üzərində hakimiyyətini hər gün daha da artırır. Növbəti həftələrdə təqdim ediləcək Asus ROG Phone 6 smartfonundakı 165Hz tezlikli AMOLED ekran panelini belə Samsung istehsal edəcək. Notbuk monitorundakı 240Hz OLED monitor isə ötən ay Display Week 2022 tədbirində nümayş etdirilmişdi. Lakin bir cihaz üzərində ilk dəfədir təqdim edilir.
OLED dedikdə aydın məsələdir rənglərin nə qədər möhtəşəm olacağından bəhs etməyə ehtiyac yoxdur. Raider GE67 HX modelində işlədilmiş bu panel 15,6 düym ölçüyə sahibdir. Təsvir ölçüsü QHD (2560×1440 piksel) olub, 1.000.000:1 kontrat nisbətinə sahibdir. Tam olaraq 0.2ms gecikmə müddəti vəd edir. VESA DisplayHDR 600 sertifikatına sahib olduğunu da qeyd etməliyik. Oyunlarda möhtəşəm görüntü əldə edə biləcəyiniz dəqiqdir. Təbii ki, MSI istehsalı oyun notbukunun yüksək performansı da burda sizə kömək edəcək.
MSI Raider GE67 HX notbuku İntel istehsalı ən yeni 12-ci nəsil Core i9-12900HX prosessoru ilə təchiz edilib. Ən üst variantında Nvidia GeForce RTX 3080 Ti 16GB qrafik kartı işlədilib. 64GB-a qədər DDR5-4800MHz operativ yaddaş quraşdırıla bilər. Əlavə olaraq 2 ədəd M.2 SSD yuvasına sahibdir. Bu cür möhtəşəm xüsusiyyətləri özündə birləşdirən notbukun qiyməti də xeyli yüksək olmalıdır. Top variantına 3399$ məbləğ təklif edilir.
