ASUS ROG Phone 6 seriyasından danışmazdan, ötən həftənin yadda qalan xəbərlərindən ASUS və NVIDIA şirkətlərinin hazırladığı 500Hz tezlikli monitoru xatırlamağınızı istərdik. Həmin mövzuda biz sizə insanların nəinki 500Hz, böyük bir qisminin heç 240Hz tezlikli monitorlara belə isti yanaşmadığından danışmışdıq. Aydındır qiymət amili böyük rol oynayır, lakin əsas məsələ həmin yüksək tezlikli monitorlarda eyni FPS dəyərini verən bir şey izləməkdir. 240FPS video izləməyəcəksiniz deyə normal olaraq bu monitoru oyunlarda istifadə etməlisiniz. Yəni yüksək tezlikli monitor dolayı olaraq yüksək performans verən sistem və həmin monitora uyğun FPS dəyərlərində oynanılan oyun istəyir. Smartfonlarda da problem eynidir. Hətta daha bərbaddır. Mobil oyunlar o qədər də mükəmməl sürətlə inkişaf etmir. Çıxarılmış oyunlar da limitləri sonuna qədər istifadə etmir. Məsələn, 144Hz tezlikli ekrana sahib smartfonunuz varsa 144FPS oynaya biləcəyiniz oyun sayı barmaqla saya biləcək qədər azdır. Buna baxmayaraq ASUS, 165Hz tezlikli ekran malik ROG Phone 6 seriyasının təqdimatına hazırlaşır.
ROG Phone 6 modeli 165Hz tezlikli ekranı ilə monitorlara meydan oxuyacaq
ASUS ROG brendinin bütün rəsmi hesabları üzərindən 5 iyul tarixi üçün yeni təqdimat tarixi barədə xəbər verilib. Digər brendlərdən fərqli olaraq, ASUS şirkəti bu smartfonları həm Çin, həm qlobal bazarlarında eyni vaxtda anons edəcək. Tədbirdə bizi ROG Phone 6 modeli barədə hansı yeniliklər gözlədiyindən xəbərdar deyilik. Lakin bilinən ən dəqiq detal smartfonun 165Hz tezlikli ekranla təchiz ediləcəyidir. ROG Phone 6 seriyasına aid paylaşılan posterdə bizə bununla bağlı məlumat verilir.
Ekran panelinin Samsung tərəfindən təmin ediləcəyi bildirilir. Bundan əvvəl də ASUS ROG seriyası smartfonların ekran paneli təminatçısı Samsung olmuşdur. Smartfon öz gücünü Qualcomm şirkətinin və sektorun ən güclüsü olan Snapdragon 8+ Gen 1 çipsetindən alacaq. ASUS ROG Phone 5 seriyası ilə müqayisədə ASUS ROG Phone 6 seriyasının gec çıxarılması da bundan qaynaqlanmış ola bilər. Belə ki, Snapdragon 8 Gen 1 çipseti ilə çıxarılmış smartfonun verdiyi performans Snapdragon 8+ Gen 1 platformasından xeyli geri qalacağından ASUS seriyanın davam modelini məntiqli şəkildə gecikdirib deyə düşünürük.
ROG Phone seriyasında Tencent ilə də əməkdaşlıq edilir. Tencent bu smartfonda Solar Core 3.1 adını verdiyi texnologiyadan istifadə edəcək. Smartfonun oyunlarda göstərdiyi performansın bununla optimizasiya edilməsi planlaşdırılır. Təəssüf ki, verə biləcəyimiz detallar bununla yekunlaşır. Təqdimat tarixi yaxınlaşdıqca smartfonlar barədə yeni informasiya gəlməyə başlayacaq.
