İstifadəçilərin əksəriyyətinin istifadə etdiyi monitorlar hələ də 60Hz təşkil edir. Gündəlik işlərə, başlanğıc səviyyəsi oyunlara və.s 60Hz tezlikli monitorlar yetəri qədər kifayətdir. Yox əgər bu sizi qane etmirsə böyük bir ehtimalla daha çox məbləğ ödəyərək birdəfəlik 144Hz monitor almaq barədə düşünə bilərsiniz. Büdcəniz xeyli yüksək və kompüteriniz çox güclüdürsə, 240Hz-ə qədər monitorlar başda kompüter oyunları olmaqla bütün işlərinizi görəcəkdir. Bundan da güclü monitorlar artıq peşəkar arenda oyun oynayanlar üçün idealdır. Hansı ki, söhbət 360Hz tezlikli monitorlardan gedir. Lakin araşdırdıqda 360Hz tezlikli monitorların peşəkar oyunçular tərəfindən belə az işlədildiyi görülür. 165-240Hz arası monitorlar isə aktiv şəkildə istifadə edilir. Bütün bunlara baxmayaraq ASUS və NVIDIA dünyanın ilk ASUS ROG Swift 500Hz tezlikli monitorunu hazırladığını açıqlayıb. Monitorun qiyməti və təqdimat tarixi hələlik məlum deyil.
ASUS ROG Swift 500Hz çox güclüdür!
Computex 2022 sərgisi bu gündən etibarən başlayıb. NVIDIA bu tədbir çərçivəsində süni intellekt və bulud servisləri kimi fəaliyyətlər üzərində cəmlənib. Əlavə olaraq RTX və DLSS texnologiyasını dəstəkləyən yeni oyunlar NVIDIA tərəfindən göstərilib. Amma hər şey bir yana qalsın, diqqətləri daha çox ASUS əməkdaşlığında hazırlanmış yeni ASUS ROG Swift 500Hz tezlikli monitoru öz üzərinə toplayıb. Təbii ki, belə bir monitor hazırlamısınızsa hazırladığınız şeyin nə bacardığını izləyicilərə nümayiş etdirməlisiniz.
NIVIDA GeForce kanalının paylaşdığı videoda monitoru Phantom VEO 640S kamerası 1000FPS kadr tezliyində yavaşladılmış formada qeydə alır. Valorant oyununda sıra ilə 500Hz, 240Hz, 144Hz tezlikli monitorlar qarşılaşdırılır. Realda insan gözü bəlkə də bu qədər incəliyi görə bilməz. Videoda isə 500Hz monitorun görüntünü həqiqətən o qədər hamar göstərir ki, digər monitorların gecikdiyini və ya kadr dəyişərkən görüntünü müəyyən qədər bulanıqlaşdırdığını anlaya bilirsiniz. ASUS ROG Swift 500Hz xüsusi E-TN (Esports TN) kimi adlandırılmış panel hesabına hərəkət edən görüntünün kəskinlik və dəqiqliyini artırır. NVIDIA G-SYNC Esports rejimi və NVIDIA Reflex Analyzer dəstəyi sayəsində verdiyiniz əmrlərin monitora sürətli bir şəkildə göndərilməsi təmin edilir. Monitor CS:GO, Valorant, Overwatch və Rainbow Six Siege kimi oyunlar üçün xüsusi optimizasiyalara sahibdir.
Monitordan digər oyunlarda da daha effektiv nəticə almaq üçün RTX 4090 seriyasının çıxarılmasını gözləməliyik. Çünki, oyunları 500FPS-də oynamaq üçün ya oyun çox yaxşı sazlanmalıdır, ya da sisteminiz çox güclü olmalıdır. Sonda qeyd edək ki, ASUS ROG Swift modelinin ekran paneli 1080p təsvir ölçüsünə malikdir. Yazıda bəhs etdiyimiz videonu aşağıdan izləyə bilərsiniz:
