Hər keçən gün Samsung brendinin yeni flaqman seriyası barədə daha bir detal ortaya çıxır. Belə ki, daha əvvək Exynos 2400 və Snapdragon 8 Gen 3 çipsetləri ilə təklif ediləcək smartfonun süni intellekt əsaslı xüsusiyyətlərə sahib olacağı barədə xəbər vermişdik. Yeni ortaya çıxan məlumatlara görə isə Samsung Galaxy S24 seriyasında süni intellekt imkanları ödənişli ola bilər. Qeyd edək ki, Samsung brendinin öz cihazına ödənişli əsaslarda süni intellekt alətləri əlavə edəcəyi iddia olunur. Lakin yenə də, Galaxy S24 cənubi koreyalı texnologiya nəhənginin ən ağıllı cihazı olacaq.
Ümumiyyətlə Samsung Galaxy S24 cihazı iki güclü çipset ilə istifadəçilərin qarşısına çıxacaq. O cümlədən bu çipsetlərin performans tərəfində inanılmaz güclü olması cənubi koreyalı nəhənginin qarşısında duran bütün maneələri aradan qaldırır. Ötən ay biz yeni flaqman Galaxy S24 seriyasının süni intellekt xüsusiyyətləri ilə dolu olacağı barədə danışmışdıq. Hətta cənubi koreya nəhənginin yeni flaqman cihazında Google Bard, ChatGPT kimi söhbət botlarının yer alacağı bildirilmişdi. Hələlik Samsung bu barədə 100% qərar verməsə də, deyə bilərik ki, yeni flaqman seriya süni intellekt abunəlik xidməti ilə də bizlərə təqdim edilə bilər.
Bundan əlavə 17 yanvar tarixində təqdim edilməsi gözlənilən yeni Galaxy S24 seriyası daxilində Galaxy S24, Galaxy S24 Plus və flaqman Galaxy S24 Ultra modelləri aiddir. Həmçinin, Galaxy S24 modelinin 6.2 düymlük FHD+ təsvir ölçülü ekran paneli 120 Hz ekran tezliyinə sahib olacaq. Həmçinin Galaxy S24 Plus modelinin 6.7 düymlük WQHD+ təsvir ölçülü ekran paneli 120 hz ekran tezliyinə sahib olacaq. Galaxy S24 Ultra modeli isə 6.8 düymlük WQHD+ təsvir ölçülü ekran panelinə sahib olacaq.
