Facebook, Instagram, WhatsApp və digərlərinin çətir şirkəti olan Meta insan beyni vasitəsilə şəkillər yaratmağı bacarıb. Ümumiyyətlə Meta hazırda süni intellekt texnologiyaları ilə bağlı çoxlu araşdırmalar aparır. Məhz bu araşdırmalardan biri də insan beynindən gələn siqnallardan istifadə edərək xəyaldalı şəkilləri yaratmaq idi. Meta süni intellektdən istifadə edərək insan beynindən gələn siqnalları analiz edərək, onları şəkillərə çevirməyin yolunu tapıb. Qeyd edək ki, şirkət maqnitoensefaloqrafiya yəni, beynin neyron fəaliyyətinin yaratdığı maqnit sahələrini ölçməklə beyin fəaliyyətini təsvir etməyə imkan verən neyrofizioloji müayinə adlı sistemlə bunu etməyi bacarıb.
Maqnitoensefaloqrafiya adlı bu sistem insan beynini real vaxt rejimində izləyir. Beləliklə də insanın gördüyü vizual görüntü vasitəsi ilə onun nə düşündüyünü şəkillərə çevirir. Məsələn, xəbərdə istifadə olunan şəkilə nəzər salsaq, sol tərəfdə insana 1 saniyəlik göstərilən real şəkili, sağ tərəfdə isə süni intellekt tərəfindən insan beynindən gələn siqnallar vasitəsi ilə yaradılan şəkili görərik. Beyin yalnız 1 saniyə rəsmi gördüyü üçün, onu özündə tamamlayır. Məhz bu da süni intellekt tərəfindən təsvir edilir.
Maqnitoensefaloqrafiya texnikasının məhdudiyyətlərinə görə hal-hazırda mükəmməl nəticələr verməyən sistem, hələ də böyük bir gələcəyi ortaya qoyur. Hələlik bu texnologiya bizlərə inanılmaz olaraq görünsə də, gələcəkdə bütün sahələrdə, istifdə edilə bilər. Meta CEO-su Mark Zuckerberg və həyat yoldaşı Priscilla Chan daha əvvəl sağlamlığa yönəlmiş böyük bir açıqlama ilə diqqət çəkmişdilər. Belə ki, İllər əvvəl Mark Zukerberq və Priscilla Chanın əsasını qoyduğu “The Chan Zuckerberg Initiative” adlı fond uzun müddətdir ki, sağlamlığa diqqət yetirir və burada araşdırmalara milyardlarla dollar sərmayə qoyub.
