Dünyanın ən populyar naviqasiya xidməti Google Maps nəhayət iPhone və iOS smarfonları üçün də tıxac saatlarını əvvəlcədən göstərəcək. Qeyd edək ki, bu funksiya Google Maps xidmətinin masaüstü versiyasından uzunmüddətdir mövcud olsa da, tətbiq istifadəçiləri üçün əlçatan deyildi. Yəni iOS və Android istifadəçiləri smarfonlarındakı Google Maps tətbiqi ilə tıxacların nə zaman olacağını bilmirdi və marşrutlarındakı gecikmələr əvvəlcədən proqnozlaşdırılmırdı. İndi isə tətbiqə əlavə edilən yeni funksiya ilə istifadəçilər əvvəlcədən planlaşdırdıqları marşrutları üzərində təxminən hansı saatlar arasında tıxac olduğunu və nə qədər gecikmə yaranacağını biləcəklər.
Bildiyimiz kimi, Google Maps istifadəçilərə marşrutu yəni, gediləcək yeri əvvəlcədən planlaşdırmağa imkan verirdi, lakin tıxac saatları barədə heçbir məlumat vermirdi. Məhz bu səbəbdən də tətbiq tərəfindən istifadəçilərə verilən marşrut və ya plan gecikmələrə məruz qalırdı. Yeni funksiya ilə isə artıq bu problemlər aradan qalxacaq. Tətbiq istifadəçilərə əvvəlcədən daxil etdikləri məntəqəyə çatmaq üçün təxminən neçə saat tıxacda qalacaqlarını da bildirəcək. Bunun üçün istifadəçilər sadəcə olaraq gedəcəkləri saatı, məkanı doğru daxil etməlidirlər.
Qeyd edək ki, tətbiq yeniləndikdən sonra artıq bu funksiyalar da istifadəçilərə təklif olunacaq. Yeni funksiyadan istifadə etmək üçün hərzamankı kimi, gedəcəyimiz ünvanı daxil edirik, daha sonra bizə təklif olunan marşrutu seçirik. Növbəti mərhələdə isə sağ üst küncdəki 3 düymə ikonuna toxunaraq, marşruta başlama tarixini daxil edirik. Məhz bundan sonra tətbiq bizə planladığımız marşrut üzərində nə qədər gecikmə olduğunu göstərəcək. Yəni təxmini başa çatma vaxtı adlı bir tarix verəcək.
