Xiaomi şirkətinin Redmi alt-brendi yeni nəsil Redmi Note 13 seriyasını ötən saatlarda Çin bazarı üçün təqdim etdi. Redmi Note 13 Pro seriyası ənənəvi qaydada 2 fərqli modellə qarşımıza çıxdı. Onlardan biri Redmi Note 13 Pro modelidir ki, standart kəskin kənarlı üslubunu qorudu. Lakin Redmi Note 13 Pro+ modeli özlüyündə ciddi dəyişikliklər gətirir. Sadə Redmi Note 13 isə standart orta səviyyəli modeldir.
Beləlikə yeni Redmi Note 13 seriyası daxilində Pro+ modeli özünəməxsus dizaynı və qıvrımlı ekranı ilə ortaya çıxıb. Seriyanın ilk qıvrımlı modeli olan Redmi Note 13 Pro+ eyni zamanda müxtəlif əlamətdar xüsusiyyətləri ilə diqqət çəkir. Məsələn, artıq bu model IP68 sertifikatı ilə su və toza qarşı dayanıqlıdır.
Yeni model 1.5K təsvir ölçülü 6.67 düymlük Tianma T7+ OLED ekran panelinə malikdir. 120Hz görüntü yeniləmə tezliyini dəstəkləyən smartfonun ekranı 1800 nit maksimum parlaqlığı, eyni zamanda ekran altı barmaq izi sensoru ilə flaqmanları axtartmır. PWM texnologiyası isə TÜV Rheinland sertifikatında 1920Hz səviyyəsindədir. Gorilla Glass Victus ilə zərbələrə qarşı davamlıdır.
Redmi Note 13 Pro+ modeli Samsung tərəfindən hazırlanmış 200 MP 1/1.4 düymlük ISOCELL HP3 Discovery Edition sensoru ilə təqdim edilir. Kamera modulunu 8 MP ultra-geniş, 2 MP makro obyektivlər tamamlayır. Selfi kamerası isə 16 MP təsvir ölçüsünə sahibdir.
Əslində, bura qədər hər iki smartfonun texniki cəhətdən sahib olduğu xüusiyyətlər tamamilə eyni görünür. Tək fərq qıvrımlı ekran paneli və arxa panel dizaynı tərəfindədir. Bu yerdə qeyd edək ki, hər iki cihaz maksimum 4K@30FPS arxa kamera hesabına video qeydlər edərkən, selfi kamerası ilə video qeydlərdə 1080P@60FPS ilə Redmi Note 13 Pro+ üstünlüyə malik kimi diqqət çəkir. Redmi Note 13 Pro sadə modelində bu barədə rəsmi Xiaomi veb-səhifəsi məlumat yerləşdirmir. Ola bilsin, bu xüsusiyyət Redmi Note 13 Pro üçün məhdudlaşdırılıb.
Lakin performans cəhətdən xeyli dəyişikliklər var. Redmi Note 13 Pro+ modeli öz gücünü MediaTek Dimensity 7200-Ultra çipsetindən alır. Redmi Note 13 Pro modelində isə Snapdragon 7s Gen 2 çipseti quraşdırılır. Dimensity 7200-Ultra çipseti 4nm TSMC istehl prosesi və ARM v9 arxitekturası ilə hazırlanmış yeni nəsil çipset olsa da eynisini Redmi Note 13 Pro modelində olan Snapdragon 7s Gen 2 üçün söyləyə bilmərik. Çünki, Snapdragon 7s Gen 2 texniki cəhətdən sürət aşırdılmış və yenilənmiş Snapdragon 6 Gen 1 kimi qiymətləndirilir. Bu baxımdan insayderlərin dediyinə görə Snapdragon 778G Accelerated Edition, 782G, 7 Gen 1 çipsetlərindən geridədir.
Redmi Note 13 Pro+ modeli 5000 mAs batareyası ilə 120 Vatt sürətli şarj dəstəkləyir. Redmi Note 13 Pro modeli isə cüzi daha böyük olan 5100 mAs batareyası hesabına 67 Vatt sürətli şarja imkan verir. Hər iki cihaz stereo səs ucaldanlarla gücləndirilib. İndi isə Redmi Note 13 seriyası daxilindən sadə modelə nəzər salaq.
Redmi Note 13 seriyası daxilində sadə model nə vəd edir?
Standart 6.7 düymlük FHD+ AMOLED ekrana malik cihaz 120Hz görüntü yeniləmə tezliyinə sahibdir. Ən əsas üstünlüyü sələfi ilə müqayisədə 2160Hz PWM qarartma texnologiyası ilə gəlməsidir. Gücünü Dimensity 6080 çipsetindən alır. Qeyd edək ki, Dimensity 810 çipsetinin təkrar brendləşdirilmiş variantıdır. 100 MP əsas, 2 MP dərinlik sensorları ilə gücləndirilib. Ehtimallara görə ISOCELL HM seriyasından gələn fərdiləşdirilmiş 108 MP sensor 100 MP təsvir ölçüsündə işlədilir. 5000 mAs batareyası 33 vatt sürətli şarj dəstəkləyir. Ekran çərçivələri optimallaşdırılıb və dizayn daha gözə yatımlı hal alıb. IP54 sertifikatı ilə su sıçraması və toza qarşı dayanıqlıdır. Həmçinin ekran paneli də Gorilla Glass 5 ilə qorunur.
Cihazların qiyməti nə qədərdir?
Redmi Note 13 modelinin 6-128GB variantı 150$, Redmi Note 13 Pro modelinin 8-128GB variantı 191$, Redmi Note 13 Pro+ modelinin 12-256GB variantı 260$-dan təklif ediləcək. Mart ayına qədər, təqribi fevral aylarının sonlarına doğru qlobal bazarda təqdim edilməsi gözlənilir.
